Shillong, Lber 15:
Ki Executive Member (EM) kiba dei ki dkhot ka Executive Committee (EC) ka Khasi Hills Autonomous District Council (KHADC) ki la ïatai ha ka sngi balang haba ïadei bad ki katto katne ki mat kynthup ïa ka Uniform Civil Code (UCC), nalor ka jingdonkam ban ïoh biang ïa ka bor ban ai ïa ka syrnot Schedule Tribe (ST), bad ban leit tynruh ïa ka Sorkar Jylla halor ka jingsahteng ban phah ïa kawei ka aiñ-rew kaba dei shaphang ka kur ka jait, kaba tip kum ka Khasi Hills Autonomous District (Khasi Social Custom of Clan Administration) Bill, 2022.
Haba ïathuh ïa kane, u Chief Executive Member ka KHADC, u Bah Titosstarwell Chyne u la ïathuh ba haba ïadei bad ka UCC, la rai ban lum ïa ka jingïalang jong ki CEM na baroh lai tylli ki District Council na ka bynta ban ïatai sani bad shim lang ïa ka rai.
Haba ïadei bad ka Clan Bill, u CEM u la ong ba ka EC kum ka kynhun kan buddien biang ïa ki aiñ kiba ka Ïingdorbar ka la dep ban mynjur bad kiba dang sahteng ban ïoh ïa ka jingmynjur na u Lat ka Jylla kynthup ïa ka Clan Bill. Nangta kin leit ïakynduh ruh ïa u Symbud Myntri Rangbah ka Jylla, u Bah Prestone Tynsong uba peit ïa ka tnat District Council Affair ha ryngkat u Myntri Rangbah u Conrad K Sangma na ka bynta ban pynsngew ha u halor ka jingsahteng ka Clan Bill kaba la dei ban phah sha u Lat ka Jylla ba un ai ïa ka jingmynjur jong u.
U CEM u la ïathuh ba haba ïadei bad ka Clan Bill, ka kaiphod kaba la pynkhreh da ka Commitee kaba kyrpang kaba la khlieh da u dkhot ka Ïingdorbar, u Bah Bindo M Lanong ka kren shaphang ka jingdon ki seng kur, bad ka jingpynrung kyrteng ïa ki kur, bad ka jingshim jait bad thoh jait kulmar.
Haba ïadei bad ka jingshim jait ki khun ki kti, u CEM u la ong ba haba ïadei bad ka jingshim jait, ka dei beit ban shim na ka kmie.
Shuh shuh u CEM u la ïathuh ba ka Executive Committee kan pynsngew biang sha ka Sorkar bad dawa ruh ba ïa ka jingai syrnod Schedule Tribe (ST), dei ban bynshet ha ka District Council ban ai ïa ka syrnot kumba la leh ha ki snem kiba mynshwa.
Ka EC kan kyntu ruh ïa ka Select Committee ban pynkloi noh ïa ka kaiphod kaba ïadei bad ka Inheritance Bill khnang ban ïoh wanrah ha ka dorbar ka ban sa wan jong ka KHADC.
