Shillong, Lber 15:
Katba ki paidbah nongleit nongwan ki dang ïa bunkam ha la ki kam ki jam, kyndit-kynsan ka la mih ka jingïapynibor hapdeng uwei u rangbah bad ki shipai ka tnad Border Security Force (BSF) kaba la jia ha ka Sngi Balang hakhmat khyrdop jong ka Civil Hospital, Shillong.
Katei ka jingïapynibor ka la mih hadien ba ka trok jong kitei ki shipai BSF kaba don ïa u nombor ML-05-W-4721 ka la jan leit tynrah ïa kawei ka thuk-thuk jong uwei u rangbah ba la tip kyrteng kum u M. K. Marak kaba don ïa u nombor ML-05-Z-5069.
Katei ka thuk-thuk ka dang thmu ban rung shapoh Civil Hospital.
La ïathuh ba katei ka trok BSF bad katei ka thuk-thuk ki dei kiba dang wan na ka thaiñ Barik Point bad katei ka thuk-thuk ka la ai dak jingkdew ban rung shapoh Civil Hospital, Shillong, hynrei kyndit-kynsan katei ka trok ba kit ïa ki shipai BSF ka la leit ban tur bad tynrah ïa katei ka thuk-thuk na u nar-kah-kjat kaba la pynlong ïa utei u rangbah ban bitar lep namarba u la kit lang ïa ka lok lem bad i khun rit.
Kane ka jingïapynibor ka la pynlong ïa u nongñiah jong katei ka thuk-thuk ban kiew shi syndon ha katei ka trok bad sei ïa utei u nongñiah shabar.
Ha kajuh ka por, u nongñiah jong katei ka trok u la leit ban sei da u nar rod ‘libar’ da ka jingthmu ban tied ïa utei u nongñiah thuk-thuk.
Hadien katto-katne por jong ka jingïania bad jingïapynibor, na ka liang ki pulit pynïaid kali ki la wan poi noh ha katei ka jaka ban tem ïa katei ka jingïakynad namar ka la ïalam ruh sha ka jingdheng kali kaba jur ha katei ka jaka.
Na ka liang ki pulit pynïaid kali ki la pynkit noh ïa kitei ki arngut sha Civil Hospital ban leh ïa ka ‘Medical Check-up’ bad hadien kata la pynkit noh ïa ki sha Sardar Police Station ban tohkit halor kane ka jingjia.
