Panbor B. Lyngdoh
Ba radbah jong ka Congress Party nga kyndit thret kumba iuh tdong Bsein bad sngewlyngngoh bad sngewsih ba u Bah P. T. Sawkmie u veteran Politician, u liem noh ha kane ka Election MLA ba dang shu dep, haba la jan man la ka taiew ha ki kot khubor Khasi la paw ki kam jong ka jingleh bha ia ka Mawlai Constituency. Te, mynta ka jingkylli ka mih hato balei mo ka leit jia kumto? Kan don ka jingbakla haei – re – haei bad kata ka dei namar ba u la shah pynshoi noh ha ka jingsarong kaba iaid ha shuwa ka jingjot (pride goes before destruction), namarkata, duna noh ka jingkhein (1×1=0), ba lada nga leh katba lah ngan jop suk biang.
Te, kum kane ka jingsngewthuh bakla ba tang shimet kam wanrah jingmyntoi ei – ei ruh em, pynban ka long ka jingduh nong ia ki Paidbah jong ka Constituency. Jin ba u neh bad ka Congress Party la thikna ba un jop don burom biang. Tip kan jia aiu mo ia ka kam saiñ hima sima jong u ? Ym tip. To, shu kyrmen ia kaba bha (hope for the best).
Sngewlehrain phi ba u MP ha kajuh ka por President jong ka MPCC u la rem jah burom noh ha kane ka MLA election ba dang shu dep, ha ka jingshisha u la dei ban khein jingkhein bha (thoroughly calculate) ha shuwa ba un contest ia ka MLA election, wat ia ka seat kum u President um dei ban shimti u la dei ban ailad shawei khnang ban skhem ka Party. Hynrei u khlem peit jngai – u Conrad K. Sangma u contest MP u jop MLA ruh u jop kumjuh ka para jong u ka Agatha K. Sangma dei namar ki biang ia ka jingkhein (assessment) kaba mut ka jingiatylli ki Paduh Garo. Te, kum u briew ba la shongthait na ka kam bad nongkyrshan jong ka Congress Party nga kyrpad ba nangne shakhmat sngewbha ban da pyrkhat sani bha ha shuwa ban shim ia kano kano ka rai (to da thoroughly before taken any drastic decision). Naduh u Dr. Mukul Sangma ex – CM u la tan 12 ki Congress ki MLA sha ka TMC, mynta ki ia don sa tang 5ngut, phi iohi ia ka jingsarong (1×4=3). Ka Dr. M. Ampareen Lyngdoh, te, ka biang bha ka jingkhein jong ka kumta ka la ioh ministership (1×5=5). To, sngewbha ia pan ia ka jingsngewrit na U Blei haba phi dang ia shakri Paidbah, namar ia ka jingsarong – jingbishni U isih bha.
Don katto katne ki Constituencies hapoh Sor Shillong jaboh – jabain, Sor Jowai, Khliehriat, Nongstoin, Nongpoh ba la trei borbah ka Pisa, hynrei don pat katto katne ba kam shym la lah ban trei kam, wat lada la theh Pisa bad kito kiba mlien ban tare Pisa ki pynduh nong kaba khraw ia la ka jong ka Constituency. Haba kren shaphang ka jingiatylli para – Khasei – Khasoi ka long ba eh phi ban ioh, namar baroh baroh ki ia kwah long C. M. Dy. C. M. bad kumta ter ter ……….. Tang ka ia dait ia shrut bishni para mangi, kumta khyllem noh. Katba ki Paduh – Garo ki iatylli para – maki, kumta la jop suk bun seat ka NPP. Ha Garo Hills ym don Khasei – Khasoi ba ia contest MLA katba hapoh Shnong jong ngi bun ki Paduh – Garo kiba ia contest MLA bad jop suk. Haba kumne lah hi ban sngewthuh ia ka jingiatylli jong ngi ? Em, ngin nym lah satia, namar ngi dang dei ki Muid biej – kale lap miet sa tang ha ka jingsarong, jingiabishni.
Balei mo haduh 2ngut ki Dy. CM Khasei – Khasoi ? Don jingmut sha lyndet bad la sngewdei ba uwei na ki u dei ban shong ha Tura mini – Secretariat, ban shong baroh 2ngut ha Shillong paw biej – kale ia ngi ki Muid. Peit ioh phi ia sngewthuh bakla ba nga kynshoit pyniapher Jaidbynriew. Em phi ngam don jingthmu kumta,nga shu pynpaw tang ia ka jingshisha jong ka jingstad – buit bad jingiatylli jong ki Paduh – Garo. Lano mo ngin ioh noh ka jingiasngewthuh jingmut, jingiatylli ?
