Shillong, Lber 15:
Ka Myntri ka tnad ka koit ka khiah, Dr. Mazel Ampareen Lyngdoh ha ka Sngi Balang ka la leit ban jurip ïa ka jaka sumar ïa kiba pang bampong kaba ha Civil Hospital, Shillong.
Ha katei ka sngi la don ryngkat ka Dr. Anisha Mawlong kaba dei ka Specialist, HOD ka tnad sumar Radiation Oncology, u Dr. W.B. Langstieh, HOD ka tnad sumar Pathology, ki heh ophisar ka tnad ka koit ka khiah bad ki doktor ka Civil Hospital.
Ka Myntri ka la leit ban ïakynduh ruh ïa ki doktor ha ka jaka ai jingsumar ha Cancer Wing jong ka Civil Hospital bad jurip ïa ki jaka treikam jong katei ka aspatal.
Ka Dr. Ampareen ka la ïoh ka lad ban ïakren bad ki nongpang kiba thiah ha katei ka jaka sumar bad hadien katei la pynlong sa ïa ka jingïalang ha ka jingïadonlang ki doktor bad ki heh ophisar ka tnad ka koit ka khiah.
Haba kren sha ki lad pathai khubor hadien ka jingïalang, ka Dr. Ampareen ka la ong ba ka jingpang bampong ka dei kawei na ki nongpynïap hapoh ka Jylla Meghalaya.
Ka la ong ba kane ka jingwan jurip jong ka ïa katei ka jaka sumar kumjuh ïa kiba pang bampong ka la plie ïa ki khmat jong ka bad ka la ong ba ki la don shibun bah ki jingkylli ba lano katei ka jaka ai jingsumar kan treikam noh pura.
“Ka la don ka jingtrei shitom kaba radbah ban ai jingsumar ïa ki nongpang ha kane ka jaka sumar bad kumba ka long, la ïohi ba ka jingpang bampong ka dei kawei na ki nongpynïap hapoh ka Jylla Meghalaya,” ong ka Dr. Ampareen.
Ka la ïathuh ba ki kynhun doktor ha katei ka jaka ai jingsumar ki long kiba la nang la tbit bha na ka bynta ban ai ka jingsumar kaba pura.
Ka Dr. Ampareen ka la ong ba katei ka jaka ai jingsumar ïa kiba pang bampong dang shen ka la sdang ïa kawei ka prokram ka bym donkam ban siew eiei na bynta ki briew kiba kwah ban phah peit bniah ïa katei ka jingpang bad kane kan dei tang na ka bynta ka East Khasi Hills naba ha kane ka thaiñ, la lap ba ki la don bun eh ki nongpang haba ïadei bad kane ka jingpang.
“Kane ka prokram ka la sdang bad haduh kumba 2 hajar ngut ki briew ki la phah peit bniah ha ki 200 tylli ki Camp,” la ong ka Dr. Ampareen.
