Shillong, Lber 15:
Ka Langsning XI Cricket Club ka la pynliem noh ïa ka Sputnik Spartan da 5 wiket ha ka lympung ïalehkai Super Division Shillong Cricket League 2022-23 ba la pynïaid da ka Shillong Cricket Association.
Ha kane ka jingïakhun kaba la long ha ka sngi Balang ha madan Polo, ka Langsning kaba la jop ïa ka jingkynting pisa, ka la ailad shwa ïa ka Sputnik ban tied nyngkong ha kaba ka la kamai 179 run bad shah pynkhyllem 8 wiket ha ki 38 over. U Kush Agarwal u la tied 43 run na ki 67 bol bad u Abhishek Gupta u la tied 42 run na ki 52 bol. Katba u Deibormi Rngad bad u Sanvert B. Kurkalang ki la khur mar 3 wiket na ka bynta ka Langsning.
Haba wan shimti ïa ka pali ba ar, ka Langsning ka la lah ban kynjoh sha ka thong da kaba kamai 181 run bad shah pynkhyllem 5 wiket ha ki 35.2 over. Kane ka la wan lyngba ka jingïalehkai bha u Bamanbha Shangpliang uba la ïoh ban khyrwit ïa ka shiteng spah da kaba ïoh 86 run na ki 103 bol bad u Sanvert u la tied 30 run na ki 22 bol. Katba u Arbin Singh u la khur 3 wiket bad ïa ka shi wiket la khur da u Ayush Rabha na ka bynta ka Sputnik. Ïa ka nam ‘Man of the Match’ la khur da u Bamanbha Shangpliang.
