Khliehriat, Lber 15:
Lai ngut ki briew ki la shah kem halor ka jingdonkti ban khaïi ïa u drok ‘heroin’ ba khia 32.5 gram napoh ka kali Maruti Car ML05-D-3783 ha ka step sngi Balang ha ïew Lad Rymbai, East Jaiñtia Hills District.
Ki pulit ki la ïathuh ba hadien ba ïoh ïa ka jingtip kaba tikna ba don lai ngut ki briew kiba kyrteng u Rudolf Franklin Lyngdoh (28 snem) bad u Aibankyrshan Kharlyngdoh na ka shnong Umsning, Ri-Bhoi District, u Shemphang Lakhiat (29 snem) na ka shnong Mawlari Mawkhan, Ri-Bhoi District kin mih na Silchar bad kiew sha Umsning da kawei ka Maruti Car (shimet) kaba don ïa u number ML05-D-3783 kaba kit ryngkat ki mar beaiñ.
Hadien kata ki pulit mar-mar ki la pynlong ka jingap shrip ne Naka ha ïew Lad Rymbai NH-06 bad ha ka por 3 baje dang step phyrngab ki la ïoh bat ïa katei ka kali.
Ha ka jingtalasi ïa ka kali, ki pulit ki la lap ïa lai tylli ki synduk sabon ba la song ïa u drok (heroin) ba khia 32.5 gram.
Shuh shuh na kitei ki briew la ïoh kurup ruh ïa lai tylli ki mobile phone bad ka pisa T.54, 150.
Ki pulit ki la kem noh ïa kine ki lai ngut bad la pynngat ïa ki hapoh ka aiñ NDPS Act bad ka jingtohkit ki pulit ka thanad Khliehriat ban lap shuh ïa kiba donkti ka la ïaid shakhmat.
