Itanagar, Lber:
Ka Central Bureau of Investigation (CBI) ha ka 13 tarik mynta u bnai ka la pynrung da ka ‘chargesheet’ pyrshah ïa 2 ngut ki briew kiba don bynta ha ka mokotduma kaba ïadei bad ka jingjia lait tuh jong ki jingkylli eksam ba la pynlong da ka Arunachal Pradesh Public Service Commission (APPSC).
Ha katei ka sngi, na ka liang ka CBI ka la pynrung da ka ‘chargesheet’ pyrshah ïa u Taket Jerang bad ïa u Obur Jerang ha Yupia District Session Court, Arunachal Pradesh.
Kat kum ki jingïoh lum khubor la ïathuh ba kitei baroh 2 ngut ki la don bynta ba thied bad die ïa ki jingkylli eksam jong ka sobjek history (Train Graduate Teacher – TGT). Kat kum ka jingïathuh jong Gyamar Ramesh u ba dei uwei na ki samla u ba don bynta ban ïakhun ïa ka eksam APPSC bad u ba la leit ruh ban iadon bynta ha ka sngi tian bishar ïa kitei ki 2 ngut, u ïathuh ba na ka liang ka ïing kashari ka la bthah ïa u Taket Jerang ba un leit ban ai ïa ka jingsoi jong u bad kumjuh ruh ïa ka rukom thoh dak jong u (signature bad handwriting) sha ka ïing kashari khnang ba kan khmih bniah halor katei ka mokotduma.
Kat kum ki jingïoh lum khubor la ïathuh ba dang shen na ka liang u Taket Jerang u la lait jamin na kaei ka mokotduma kaba ïadei bad ka jinglait tuh jong ki jingkylli eksam APPSC.
La ïoh jingtip ruh ba na ka liang ka ïing kashari ka la ai ïa ka ‘interim bail’ kaba 20 sngi na ka bynta u Iken Bagra (kpa jong u Kender Bagra bad Kenjum Bagra – JE RWD) na ka daw jong ka jingshitom klongsnam jong u.
Hynrei pat na ka liang ka ïing kashari ka la kyntait ban pyllait jamin ïa u Lotu Gadi – hynmen jong u Loter Gadi – Field Investigator Officer u ba la donkti lang ha katei ka mokotduma lait tuh jong ki jingkylli.
Kat kum ki jingïoh lum khubor la ïathuh ba dei ha u bnai Risaw jong u 2022 ba ka CBI ka la pynrung ïa ka mokotduma halor katei ka jingjia lait tuh jong ki jingkylli eksam ba la pynlong da ka APPSC. Ki jingkylli kiba la lait tuh ki dei na ka bynta ka kam Assistant Engineer (Civil) ba la pynlong da ka APPSC ha ka 26 bad 27 tarik jong u Nailar, 2022.
