Nongstoiñ, Lber 15:
Ka Lamare SC na ka nongbah Shillong ka la khur ïa ka nam lahduh ha ka lympung ïalehkai phutbol ba la tip kum ‘Invitation Knockout Football tournament 2022-23’ ba la pynlong da ka New Nongstoiñ Sports Social and Cultural Club (NNSSCC).
Katei ka nam jop jong ka Lamare SC ka la wan urlong hadien ba ka lah ban pynliem noh ïa ka Ri Bhoi United SC da 1-0 kol ha ka jingïakhun phainal kaba la long ha ka sngi Balang ha madan New Nongstoiñ bad ïa ka nam ‘Man of the Match’ la khur da u Donlad Diengdoh na ka Lamare SC.
Haba phai khyndiat sha katei ka jingïalehkai, ka Ri Bhoi United ka la ïoh ïa ka kabu ksiar hadien ba ïoh shut ïa ka penalty hadien ba u rangapkol ka Lamare SC u Neitho Chalieu u la shah beh noh na madan namar ka jingïoh pdiang ïa ka red card ha ka minit kaba 20. Hynrei ka jingkhmih lynti ka Ri Bhoi United ka la pulom noh na ka daw ka jinglah ban kyrda na ka jingshah thep da u rangapkol ba mih pli ha ka jaka u Neitho.
Nalor kata, wat la ka Ri Bhoi United bun sien ka la ñion tyngeh ïa ka Lamare SC, kaba hap ïakhun tang 10 ngut ki rangïalehkai, hynrei kam shym la lah ban pynurlong.
Hashwa ban kut ka jingïalehkai kata ha ka minit kaba 90+7, u Donlad Diengdoh u la ïoh ban pynbuh bol na ka bynta u Nelson Rymbai, uba khlem pynlehnohei ïa kane ka kabu ksiar bad ban pynlong ïa ka Lamare SC ban khur syndon ïa ka jingjop.
Ha katei ka sngi u MLA & MDC ka Nongstoiñ Constituency u Bah Gabriel Wahlang u la long kum u kongsan ha ryngkat ka jingïadonlang ruh u sordar ka New Nongstoiñ u Bah Sraly Rashir bad kiwei kiba la sam ïa ki khusnam ba kynthup ïa ka song pisa kaba T. 7 lak sha ka Lamare SC kum ka lahduh, bad T. 3 Lak sha ka Ri Bhoi United kaba la wan ba-ar ryngkat ki takma bad ki trophy.
