Guwahati, Lber:
Ka bor sorkar ka Criminal Investigation Department (CID) jong ka tnat pulit ka jylla Assam ha ka 14 tarik mynta u bnai ki la ïoh ban kem ïa 22 ngut ki briew kynthup ïa 2 ngut ki nonghikai bad 19 ngut ki samla pule na ka daw jong ka jingdonkti jong ki ha ka jingjia lait tuh ki jingkylli eksam HSLC ha ka sobjek ‘General Science’.
Kat kum ka jingïathuh jong u DGP ka tnat pulit Assam – GP Singh u la pyntip ba ïa kitei ki 22 ngut la ïoh ban kem na ka nongbah Guwahati, North Lakhimpur, Dhemaji, Sadiya, Dibrugarh bad na Tinsukia.
U heh pulit u la pyntip ruh ba ha ka miet jong ka Lah Sngi U Blei mynta ka taiew, ki bor pulit ka CID ki la leit ban kem ïa u headmaster ka Bhauri Devi Sarawgi Government High School – Jyotirekha Borgohain, assistant teacher – Herambo Kumar Das bad kumjuh ruh ïa u nongñiah kali u ba la tip kyrteng kum u Bindeshwar Timung. U heh pulit u la ïathuh ba kitei ki 3 ngut ki dang don mynta hapdeng ka jingshah tohkit ha ki bor pulit ka tnat CID.
Kat kum ki jingïoh lum khubor la ïathuh ba na ka liang ka Board of Secondary Education Assam (SEBA) ha ka Lah Sngi U Blei mynta ka taiew ka la pynbna ban pynlong biang ïa ka eksam HSLC na ka bynta ka sobjek General Science hadien ka jingjia lait tuh jong ki jingkylli eksam.
Halor katei ka jingjia la ïathuh ba ïa ka mokotduma la leit ruh ban pynrung bad ka tnat CID jong ka jylla. La ïoh jingtip ba na ka liang ka tnat pulit CID ka la tohkit ruh ïa u Nilanjan Bordoloi – principal jong ka Salt Brook Academy, Dibrugarh, ha kaba ïadei bad katei ka jingjia lait tuh ki jingkylli eksam.
Kat kum ki jingïoh lum khubor la ïathuh ba na ka liang ka tnat pulit CID ka la leit ruh ban kem ïa ki 5 ngut ki khynnah pule jong ka Salt Brook Academy, Dibrugarh bad ïa uwei u khynnah pule na ka thaiñ Gogamukh. Kitei ki khynnah pule ki la don bynta ban pynsaphriang ïa ki jingkylli kiba la lait tuh lyngba kawei ka kynhun WhatsApp.
Halor katei ka jingjia la ïathuh ruh ba na ka liang ka tnat pulit CID ka la khot hajir ruh ïa u Controller of Examination jong ka SEBA – Nayan Jyoti Sarma bad ïa u Chief Controller Jimli Kakoty Saikia.
Haba phai sha kawei pat ka khubor la ïathuh ba na ka liang ka Indian Students’ Organisation (ISO) ka la pynbteng ïa ki jingïakhih ki jong ka halor ka rai jong ka SEBA ban pynkylla ïa ka tarik eksam bad ka la dawa ruh ba u chairman jong ka SEBA – RC Jain ba u dei ban hiar shuki noh. Na ka liang ki nongïalam ka ISO ki la ïathuh ba ki dap da ka jingsngewkhia kaba khraw halor ki jingjia lait tuh jong ki jingkylli bad kumjuh ruh halor ka rai jong ka SEBA ban pynsangeh ïa ka eksam.
Haba ïakren bad ki lad pathai khubor, na ka liang u Vice President jong ka ISO – Abdul Kalam Azad u la ong ba ka jingpynsangeh ba kynsan ïa ka eksam na ka bynta ka sobjek General Science kaba la buh ban pynlong ha ka 13 tarik u Lber ka la ktah ïa ki hajar ngut ki khynnah pule jong ka jylla kumjuh ruh ïa ki kmie ki kpa jong ki. U la kynthoh ruh ba katei ka jingjia lait tuh jong ki jingkylli ka dei na ka daw jong ka jingtlot trei kam jong ka SEBA bad ka jingkheiñ sting jong ki bor pynïaid eksam. Ka ISO ka la kyntu ïa ka Sorkar Assam ba kan shim da ki sienjam kiba kyrpang ban pynshitom tyngeh pyrshah ïa ki briew kiba donkti ha katei ka jingjia.
