Patna, Lber:
U nongïalam jong ka seng Rashtriya Janata Dal u Sunil Rai, ïa uba la shah rahbor ha Chhapra distrik kaba don ha Bihar ha ka sngi Ba-ar, u la shah pyllait noh ha ki pulit tang hapoh 24 kynta ba u la shah rahbor.
Ha kaba ïadei bad kane ka jingjia ki la don arngut ki briew kiba la shahkem halor ka jingdonkti jong ki ban rahbor ïa u Rai, la ïathuh ki pulit. Ki pulit ki la ïoh ruh ban kurup ïa ka kali ha kaba u nongïalam jong ka RJD u la shah rahbor.
Ki heh jong ka kynhun tohkit, ki la ong ba ka jingtohkit ha kaba ïadei bad ka jingjia ka dang ïaid shakhmat bad kiwei pat ki runar kiba la donktilang ha kane ka kam shen kin sa shahkem.
Ha ka sngi Ba-ar ha ka por kumba 4.30 mynstep, ki la don kumba katto katne ngut ki runar kiba la rahbor ïa u Sunil Rai ha ka kali Scorpio kaba rong lieh ha ka thaiñ kaba hap hapoh ka jingkhmih jong ki pulit ka Muffasil ha Bihar.
Ïa kane ka jingjia la lah ban ïohi lyngba ki CCTV Camera ba la don ha shi lynter jong ki sutok. Na ka jingdon jong kine ki Camera, ki pulit ki la pynlong ïa ka jingleit thwet bajur sha kylleng ki jaka ha kaba ki la lap ïa u nongïalam jong ka seng RJD bad kem ruh ïa arngut ki nongrahbor.
