Srinagar, Lber:
Ki shipai ïada ri ki la ïoh ban kem ïa u suba lehnoh uba la ïatreilang bad ka kynhun lehnoh Lashkar-e-Taiba ha Baramulla distrik jong ka Jammu & Kashmir, la ïathuh ki heh shipai hynnin ka sngi. Ki pulit ki la ïathuh ba ka la don ka jingïatreilang hapdeng ki kynhun pulit jong ka Baramulla Police, ka kynhun 29 RR jong ka tnat Army bad ka 2 Bn SSB ha kaba ka la ïarap ha ka ban ïohkem ïa une u briew ha ka por ba la pynlong ïa ka Naka Checking ha Singhpora Pattan.
“U briew uba la phong da ka Pheran (ka sopti phrok bajrong) u la wan na ka liang jong ka Matipora haba u la ïohi ïa ka kynhun jong ki shipai kiba la ïalum ha katei ka jaka ba la dei ban khmih bniah u la pyrshang ban phet hynrei ka kynhun shipai ka la beh bad kthong ïa u haban da lap bad kem ïa u,” la ïathuh ki pulit.
“Ha ka por ba la khmih bniah ïa u, la ïoh ban kurup kumba 71 song ki kuli bym pat pyndonkam jong ka suloi AK-47 bad hadien kane la rah ïa u sha patok na ka bynta ka jingtohkit.”
“Ha ka por ba la pynlong ïa ka jingtohkit une u briew u la ïathuh ba ka kyrteng jong u ka dei u Ali Mohammad Bhat jong ka Bonichakal Arampora Pattan bad u la trei ïa ka kam kum u nongïarap jong ki lehnoh bad mynta u don bad ka kynhun lehnoh LeT,” la ong ki pulit.
Ka la don ka jingmudui ba la buh bad pynngat hapoh ki kyndon ba bun jong ka Arms and ULA (P) Act ha ka jaka treikam jong ki pulit ka Pattan bad ka jingtohkit ka la ïaid shakhmat, la ïathuh ki heh pulit.
