Nongpoh, Lber 15:
Ki khun ki hajar jong ka Hima Sohïong hapoh ka shatri jong ka Joint Action Committee (JAC) ha ka sngi Balang ki la leit ban buh syndon da ka dorkhas hakhmat u Deputy Commissioner ka Ri Bhoi District ban ujor halor ka jingwan kyntur pud ka Assam shapoh u pud u sam jong ka hima.
Katkum kane ka jingujor ba la ai la ong ba kane ka jingkyntur pud ka Assam ka long da kaba pynïaid beit ïa ka jingshna ïa ka surok lyngba ki shnong ba kynthup ïa ka Kynthong Paham, Damu Paham, Umterlet, Pathar Khaiong bad ruh na ka shnong Lukhra, Garo Bhanga, Mawtyngkong, Jalur Rim, Jalut Thymmai bad Mawtamur wat lada kine ki shnong ki dei kiba hap hapoh ka jingpeit jingkhmih jong ka Hima Sohïong naduh u snem 1874; kaba la tip mynshwa kum ka Hima Nongwah Mawtamur lane kata ka Nongwah Mawtamur State.
Haba kren sha ki lad pathai khubor, u Chairman jong ka JAC, u Bah Purningstar Shabong ha ka jingïadon ryngkat kiwei ki dkhot, u la ïathuh ba ka sorkar Assam ka la sdang nyngkong ïa ka jingkyntur pud da kaba sdang ban shna ïa ka surok lyngba ka shnong Rani sha ki shnong kiba hap hapoh ka Hima Sohïong kiba kynthup ïa ka shnong Kynthong Paham, Damu Paham, Umterlet, Pathar Khaiong bad kumjuh ruh na Lukhra lyngba ki shnong Gorobhanga, Mawtyngkong, Jalut Rim, Jalut Thymmai ban mih pat sha ka shnong Mawtamur naduh ka 1 tarik u Nailur, 2022.
U Bah Purningstar Shabong u la ong ruh kumba long mynta, ki paidbah ha kitei ki thaiñ ki don hapdeng ka jingshong syier shong smiej na ka jingshah pyndik ha ki pulit bad ki bor sorkar ka Assam bad ruh khamtam ba ki paidbah nongshong shnong kim don jingshngaiñ shuh wat ban leit trei sha la ki lyngkha.
Kumta ha kaba ïadei bad kane, na ka liang jong ka JAC ka buh ruh ïa ka jingkyrpad hakhmat u Deputy Commissioner ka Ri Bhoi ba un buh ïa ki pulit pahara ha kitei ki jaka khnang ba ki paidbah kin don hapdeng ka jingshong suk bad shngaiñ.
Halor kane ka bynta, na ka liang u Bah Purningstar Shabong lyngba katei ka JAC, u buh ka jingkyntu sha ka sorkar jylla ba ka dei ban shimkhia mardor ban pynsangeh ïa katei ka jingwan kyntur pud jong ka Assam. Nangta ka la kyntu ruh ban pynsangeh ïa ka jingwan shna ïa ka shlem treikam jong ka tnat Forest ka Assam ha Nongwah Mawtamur bad khamtam eh ban phah ïa ki pulit pahara ban lait na kino-kino ki jingjia kumba la jia ha ka shnong Mukroh ha kine ki khyndiat bnai ba la dep.
