Shillong, Lber 15:
Ki saw ngut ki nongïalehkai ka Jylla ha ka sngi Balang ki la wanphai sha la ïing hadien ba ki la lah ban khur ïa ka takma ksiar ha ka World Jeet Kune Do Championship kaba la long ha Sri Lanka.
Kine ki kynthup ïa ki ar ngut shipara, kata u Francis R.R Songthiang (60 kg) bad ka Lorenza Songthiang (54kg), kiba dei ki khun jong u nongseng ka Meghalaya Jeet Kune-Do Association (MJKA) u Bah Donny Ranee bad ka nongïakhun kti barim ka Kong Anita Songthiang kiba na Laitkor Kynton-U- Mon.
Kiwei pat ki ‘thei ïalehkai kiba la khur ïa kane ka takma ksiar ki long ka Ribhalin Marbaniang (52kg) kaba dei ka khun jong ka Kong Bianglin Marbaniang na Umkynrud Kynjat Phutbol bad ka Ilawankmen Nongbri (48kg) kaba dei ka khun jong u Liverson Kharnandu na Lawsohtun Block-4.
Ha kane ka jingwanphai sha la ïing la pdiang burom ïa kitei ki nongïalehkai na Lad Umroi da ka Khasi Students’ Union Nongthymmai Circle, ka Seng Longkmie Laitkor bad ka Meghalaya Jeet Kune-Do Association (MJKA).
Na ka liang ka samla Lorenza ka la pynpaw ka jingsngewnguh ïa U Blei Trai Kynrad uba la don ryngkat naduh ba ki la mih na kane ka nongbah ban leit sha Sri Lanka bad haduh ba kin da wanphai pat sha la ïing ryngkat ki takma ksiar. “Ha kaba nyngkong eh ka burom ka leit sha i Sir Donny, i ba dei i Papa jong nga, namar dei lyngba ka jong i ba nga sa ïoh ïa kane ka burom,” ka la bynrap da kaba pyndeng artad ïa u paila sha une u Grandmaster.
“Wat la khyndiat i pisa ngi don, hynrei ngi la lah ban poi suk sha ka jaka kaba ngi thmu bad ban wanphai sha la ïing ryngkat ki takma ksiar kiba ngi la lah ban khur jingjop,” ka la bynrap da kaba ai burom ruh ïa ki bahaïing hasem, ki paralok, ki kynhun sengbhalang bad kiwei.
