Nongstoiñ, Lber 16:
Ha ka por mynsngi jong ka 16 tarik u Lber 2023, kawei ka ïing hapoh ka shnong Umshynrut ha West Khasi Hills District, ka la ingkhong khait hadien ba ki thylliej ding kiba klang bha ki la ïoh ban bam duh naphang ïa katei ka ïing. Ha kane ka jingjia la ong ba ka jingjulor jong ki jingdon jingem ka la kot sha ki phew lak tyngka.
Katkum ki tyllong khubor ba la ïoh lum la ong ba katei ka ïing ka dei jong u Bah Brostar Tyrsa khun jong u Bah Nosing Puweiñ. Wat la katei ka ïing ka la ingkhong khait, hynrei ym shym la don pat kano-kano ka jingmynsaw ïa ki mynsiem briew namar bym shym don briew ha ïing ha katei ka por.
Shuh shuh la ïathuh ba ïa katei ka jingjia la ïohi nyngkong da kiba sah marjan bad mar kumta ki la pyrta briew ban tem ïa ka ding. Hynrei, na ka jingkhlaiñ jong ka ding kim shym lah shuh kat haduh ba ki thylliej ding ki la ïoh ban bam duh bad pynkylla dpei ïa katei ka ïing bad baroh ki jingdon jingem.
Kat haduh ba pynmih ïa kane ka khubor ym shym la tip satia na kaei ka daw kaba pynlong ïa katei ka ïing ban kem ding bad pluh.
