Shillong, Lber 16:
U Myntri ka Sorkar Jylla uba peit ïa ka tnat ri jingri bad ka tnat ri dohkha ha kane ka Jylla, u Bah A.L Hek uba dang don ha nongbah New Delhi, u la bteng ban ïakynduh ïa ki Myntri ka Sorkar Pdeng khamtam eh ïa u Myntri ba peit ïa ka tnat ri jingri bad ri dohkha ha kaba u la pynsngew halor ka jingdonkam ban kyntiew ïa ka kam jngohkai pyrthei lyngba ka kam ri dohkha ha kaba u la kyrpad ïa u Myntri ka Sorkar Pdeng ban plie lad lem ban ai jingmynjur ïa ka Integrated Fisheries Development ha kane ka Jylla.
U Bah Hek u la ïakynduh nyngkong ïa u Myntri ka tnat kaba peit ïa ki riewlum, u Arjun Munda bad u la kyrpad ïa u ban ai jingkyrshan kumno ban kyntiew ïa ka lad kamai kaba ai jingshngaiñ ïa ki paid riewlum ka Jylla Meghalaya lyngba ki jingtuklar kiba wan lyngba ka tnat ri dohkha kaba la pynïaid sha ka South West Garo Hills bad banjur halor ka jingpyntreikam bha bad khmih bniah ïa ki projek kiba la pyntrei na ka bynta ka jingmyntoi jong ki nongrep .
U Bah Hek u la pynkynmaw ruh ha u Myntri ka tnat ri dohkha, uba la ong ba un shim ïa ki lad ban buh bun tylli ki shnat (unit) la ka dei ha ka ri jingri kum u sniang bad ka jingdonkam ban thaw noh ïa ka jaka ai jingsumar ïa ki jingri (State of the Art Veterinary Hospital) ha kane ka Jylla.
