Khliehriat, Lber 16:
Da ka jingïoh kem ïa kawei ka nongkhaïi drok ha East Jaiñtia Hills District, ki pulit ki la ïoh ban kem sa ïa kawei ka nongkhaïi drok na nongbah Shillong, East Khasi Hills District ha ka step sngi Palei.
Ki pulit ki ïathuh ba ha ka sngi Palei ha ka por kumba 4.00 baje mynstep ki la ïoh jingtip kaba tikna ba ka Lathazuali Ralte, 45 snem rta na Sailkan, East Jaiñtia Hills PS Lumshnong ka la bthah ïa ka Lalduhwami Ralte, 42 snem rta na Kana Veng, Champhai District Mizoram ban rah mar beaiñ na Mizoram sha Shillong ha ka kali tourist Tata Sumo kaba don ïa u number ML05-K-2432.
Ki pulit ki ïathuh ba ha ka por kumba 5.00 baje mynstep ïa katei kali la ïoh bat ha Ladrymbai hajan ka Friend Hotel.
Katkum ka NDPS Act, ïa katei ka kali la khynra ha ka jingsakhi lang ki riew shimet bad ha kane ka jingkhynra la lap ïa kawei ka pla rong ïong.
Ki pulit ki ïathuh haba plie ïa katei ka pla la lap ïa kawei ka plastic rong ïong kaba don san tylli ki synduk sabon bad hapoh kine ki synduk la lap ïa u drok (heroin) bad haba thew u don ha ka jingkhia 55.68 gram.
Haba tohkit ïa ka Lalduhwami Ralte, ka kynhun pulit jong ka East Jaiñtia Hills ki leit sha Shillong ban kem sa ïa ka Lathazuali Ralte kaba dei ka nongphah pynïaid (mastermind) ïa une u mar beaiñ.
Ïa ka Lathazuali Ralte la kem na ïingsah jong ka ha Demthring, Shillong da ka jingïarap ki pulit jong ka Madanriting bad hadien kata la ïalam sha Ladrymbai.
Ïa ka mukotduma la pynrung kyrteng ha thanat Khliehriat katkum ka Case No. 22(3)2023 U/s 21(b)/29 NDPS Act bad ka jingtohkit ka la ïaid shakhmat.
