Guwahati, Lber:
Ki bor pulit jong ka jylla Assam ha ka 15 tarik mynta u bnai ki la pyntip ba uwei u pulit Personal Security Officer (PSO) jong u SP ka thaiñ Golaghat u la dkhat jubor ïa la ka jong ka jingim halor u tyllai phasi.
U pulit PSO u ba la dkhat jubor ïa la ka jong ka jingim ha katei ka sngi u dei u ba la tip kyrteng kum u Rakesh Rai.
Kat kum ka jingïathuh jong ki bor pulit ka jylla, ki la pyntip ba tad haduh kane ka kynti kaba mynta kim pat shym la tip satia ïa ka daw ba balei utei u pulit PSO u la dkhat jubor ïa la ka jong ka jingim ha katei ka sngi.
Hadien ka jinglap ïa ka metïap la ïathuh ba na ka liang ki bor pulit ki la leit ban pynkynriah noh ïa ka met sha Shaheed Kushal Konwar Civil Hospital, Golaghat khnang ban pyndep ïa ka ‘post-mortem’.
Katei ka jingjia dkhat jubor ïa laka jong ka jigim da u tei u pulit PSO jong ka SP ka Golaghat la ïathuh ba ka la jia tang hadien 3 sngi ba uwei u pulit langrut u la dkhat jubor ïa la ka jong ka jingim halor u tyllai phasi ha kawei ka Battalion camp kaba don ha ka thaiñ Cachar district.
Utei u pulit u dei u ba la tip kyrteng kum u Biplab Chakraborty. Ïa ka metïap jong u la lap na kawei ka kamra jong ka 6th Assam Police Battalion camp kaba don ha ka shnong Kathal, Cachar District.
Ïa ka metïap jong utei u pulit la leit ban pynkynriah noh sha Silchar Medical College and Hospital (SMCH) na ka bynta ban pyndep ïa ka ‘post-mortem’.
Halor katei ka jingjia ruh kumjuh la ïathuh ba na ka liang ki bor pulit jong ka jylla kim pat shym la lap satia ïa ka daw ba balei utei u pulit langrut u la dkhat jubor ïa la ka jong ka jingim.
