Shillong, Lber 16:
Ka Sorkar Jylla ha ka Sngi Palei hadien ba ka la dep ban shong bishar ka la ai por ïa ka Harijan Panchayat Committee (HPC) ba kan ai ïa ka jubab hapoh ka 10 tarik jong u Ïaïong ha kaba ïadei bad ka jingtyrwa ban pynkynriah ïa 342 tylli ki longïing na Them Metor, Them Ïew Mawlong sha ka jaka ha ka Shillong Municipal Board (SMB).
Haba kren sha ki lad pathai khubor hadien ba la dep ban shong jingïalang, u Symbud Myntri Rangbah ka Jylla u Bah Sniawbhalang Dhar uba peit ruh ïa ka tnat Pynroi Sor u la ong, “Ngi la dep aiti ïa ka saiñdur (blueprint) halor ka jingtyrwa ka sorkar sha ki bad ngi la aipor ban jubab tat haduh ka 10 tarik u Ïaïong, 2023.”
U Bah Sniawbhalang u la ong ba ïa kane ka jingbthah kaba la shim da ka sorkar ka long hadien ba ka HPC ka la pan por lai bnai ban ai jubab ïa ka jingtyrwa ka sorkar.
“Na ka liang ka Sorkar, ngim shym la mynjur satia ïa kane ka jingkyrpad jong ki Harijan ban ai por haduh lai bnai bad ha kaba ngi la rai ban ai por ïa ki tat haduh ka 10 tarik Ïaïong ba kin jubab sha ngi,” la ong u Bah Sniawbhalang bad bynrap ba hadien kane na ka liang jong ka High Level Committee (HLC) kan sa khot ïa ka jingïalang ban shim ïa ka rai ba khatduh halor kane ka kam.
Shuh shuh na ka liang jong u Symbud Myntri Rangbah haba kylli, u la ong, “Ngin sngap shuwa ïa kaei kaba ka HPC ka don ban ong bad hadien kane ngin sa lah ban ïathuh ïa kaei kaba ngi dei ban leh bad kaei ka bym dei ban leh. Kam ïahap ïa nga ban ïathuh lypa ïa kaei kaba ngin leh”.
