Mumbai, Lber:
Katkum ka jingkhmih bniah ha kaba ïadei bad ka jingktah jong u khñiang jingpang H3N2 ha ki hynñiew sngi ba la leit, ka jylla Maharashtra ka la sakhi ba ki la don kumba arngut ki briew kiba la ïap hadien ba ki la shah ktah ha u khñiang jingpang, la pynshisha u Myntri ka tnat ka koit ka khiah jong ka jylla ha ka sngi Balang.
Ki briew kiba la ïap ha kane ka jingpang ki kynthup ïa u khynnah pule MBBS, 23 snem ka rta, na Ahmednagar bad uwei u tymmen, 72 snem ka rta na Nagpur.
U Tanaji Sawant, uba long u Myntri ka tnat ka koit ka khiah ha ka jylla, u la ong ba ha ka jylla ki la don kumba 303 ngut ki nongpang kiba la shah ktah ha u khñiang jingpang H1N1 bad 58 ngut ki dei kiba la shah ktah ha u khñiang jingpang H3N2 haduh ka 13 tarik, Lber.
“Kiba bun na kiba la shah ktah ha kine ki khñiang jingpang la shem ha kiba bun ki nongbah kum ha Mumbai, Thane, Pune, Sangli, Kolhapur bad Aurangabad,” la ong u Sawant.
Shuh shuh ha kum kane ka por kiba bun ki jylla hapoh ka ri ki la khmih bniah ha kaba ïadei bad ka jingktah jong u khñiang jingpang H3N2.
Ka Puducherry kum shi bynta ban khanglad ïa ka jingsaphriang jong ka jingpang ka la khang noh ïa ki skul na ka bynta ki klas 1 haduh klas 8 na ka bynta ki 10 sngi ïa kaba la sdang naduh ka 16 tarik, kata naduh ka sngi Palei.
U Myntri ka tnat ka pule-puthi jong ka Puducherry u Namassivayam hashwa u la pynbna ba baroh ki skul kin sa khang naduh ka 16 tarik, Lber haduh ka 26 tarik, Lber namar ka jingktah jur jong u khñiang jingpang.
U khñiang jingpang H3N2 u la ktah jur bha ha India, ha kaba ki briew ki la shitom bad shah ktah ha ka ban ring bad pynhiar mynsiem.
Une u khñiang jingpang u long shi bynta jong u khñiang jingpang Influenza A Virus uba la ktah jur bha ha kine ki khyndiat sngi ba la leit.
Kumba la phah jingkheiñ da ka tnat ka koit ka khiah jong ka sorkar kmie ha ka taïew ba la lah, la ong ba ka India ka la don kumba 451 ngut ki briew kiba la shah ktah ha u khñiang jingpang H3N2 hapdeng ka 2 tarik, Kyllalyngkot bad ka 5 tarik, Lber.
Ka jingïap kaba ha ka sien kaba nyngkong ha India ka la dei na Hassan distrik kaba ha Karnataka ha kaba uwei u briew uba la 82 snem ka rta u la ïap naba u la shah ktah ha u khñiang jingpang H3N2.
Ha ka lah sngi U Blei, ha Gujarat la ïoh khubor ba la don ba ïap ha ka sien kaba nyngkong na ka jingktah jong u khñiang jingpang H3N2.
Ki dak ki shin jong ka jingshah ktah ha u khñiang jingpang H3N2 ka long kum ka jingpang phlu kaba kynthup ka jingpang ka met ka phad, ka jingshit, ka jingsuhkhriat, ka jingsngew tlot, ka prie bad pynhiar, ka jingprie, ka jingjyrhoh, ka jingsat ryngdang, ka jingmih eitmut sngur bad kthah khlieh.
Kane ka jingpang ka saphriang na ka jingsied jong ki phngit umbiah na u briew ba la shah ktah ha ka jingpang ha ka por ba u jyrhoh, synriah ne kren briew.
Ki longkmie kiba armet, ki khyllung khynnah, ki tymmen ki kro bad ki briew kiba la don lypa ïa kiwei pat ki jingshitom ha ka met ki don jingma bha haba ïoh ïa une u khñiang jingpang.
