Perth, Lber:
Ka khubor ba lah ioh lum ka iathuh ba u Steve Smith u la hap ban pynkhreh ialade mynta na ka bynta ban shimti kum u nongialam ba nakhmat jong ka kynhun ialehkai Kriket ka Australia; ha ka jingpynkhreh na ka bynta ka lympung iakhun ODIs ka ban wan pyrshah ia ka India, hadien ba u Pat Cummins u lah dep ban shim ia ka rai na ka bynta ban dang iaisah shuwa ha la iing lajong namar ka jingkhlad noh jong ka kmie jong u dang ha ka taiew ba lah dep.
Shuh shuh ruh ka khubor ka iathuh ruh ba u Pat Cummins u lah iehnoh ha ka ban iadonlang bad ka kynhun na ka bynta ka jingwan ban iakhun bad ka India ha ka jingpynkhreh jong ka na ka bynta ka jingiakhun Test kaba lai ha Indore ha u bnai ba lah dep, hadien ba u lah ialam ia ka kynhun sha ki ar jingiakhun ba nyngkong jong ki saw jingialehkai ha ka Border-Gavaskar Trpohy. U Steve Smith hadien kata u lah shimti kum u nongialam ha ka ban ialam ia ka kynhun ialehkai Test bad uba la lah ruh ban btin shaduh ka lynti jingjop bad kawei ka jingiakhaid ha ki ar jingialehkai basah bad uba lah iarap ia ka kynhun ban pyndep ia ka jingiakhun da 2-1. Kumta u Smith u lah pynkhreh ialade ban ialam ia ka kynhun sha katei ka lympung ialehkai ba khyndiat over hadien ba um shym la ioh ban shimti shuh ia ka kam haduh san snem bad mynta un btin lynti biang sa shisien ia ka kynhun ynda ka iakynduh ia aireng ha ki lai jingiakhun bad ka India ka ban sdang naduh ka 17 tarik mynta u bnai. Kham ha shuwa, u Nathan Ellis u lah shah jied kum u nongmih bujli ha ka jaka jong u rangialehkai ba lah mynsaw u Jhye Richardson.
Ka khubor ka iathuh ruh ba u Pat Cummins u lah shah thung kum u nongialam bapura jong katei ka kynhun ialehkai ODIs hadien ba u Aaron Finch u lah shongthait noh na ka kam shakri jong u ha u snem ba lah dep. Hynrei na ka daw jong ka jingbunkam ka jong u ha ka kam shakri ia ka kynhun, katei ka kynhun ka lah don haduh kumba lai ngut ki kapten kiba lah ialam ia ka kynhun baroh kawei ha ki saw jingiakhun ODIs ba lah dep ha ryngkat bad u Smith u pynkhreh na ka bynta ban long u kapten ba saw ka kynhun ha ki san jingiakhun ODIs ba lah dep long.
Ki rangialehkai ka kynhun kiba lah shah jied na ka bynta katei ka jingwan ban iakhun bad ka India ki long:
David Warner, Travis Head, Steven Smith (C), Marnus Labuschagne, Mitchell Marsh, Marcus Stoinis, Alex Carey, Glenn Maxwell, Cameron Green, Josh Inglis, Sean Abbott, Ashton Agar, Mitchell Starc, Nathan Ellis, Adam Zampa.
