Shillong, Lber 16:
U Myntri ka tnat bording ka Jylla u A.T Mondal u la kubur ba ka tnat bording kam dei ka tnat kaba suk ban pynbiang ïa ka jingshakri, hynrei u la ong ba ka thong ka long ban pynbiang ïa ka jingai jingshakri sha ki paidbah bad kumno ban shim ki lad ki lynti ban pynhiar ïa ka jingduhnong jong ka Meghalaya Energy Corporation Ltd (MeECL).
“Kano kano ka tnat treikam ka Sorkar ka don ka thong ban pynbiang ïa ka jingshakri, bad na ka liang jong nga ruh kum u Myntri ka tnat bording, ngi don ka thong ban pynbiang ïa ka jingshakri kiba kynthup ka jingduna ban pynlip bording, ka jingïoh lum biang por ïa ka bai bording ilektrik bad ban pynduna ïa ka jingduhnong kaba tip kum ka ‘Aggregate Technical and Commercial (AT&C) loss’ jong ka MeECL,” la ong u Mondal.
U la ong ba ka tnat bording ka dei kawei kaba mad jingeh naduh mynshwa bad u sngewskhem ba yn sa lah ban weng ïa ki jingeh da ka jingïatreilang.
Haba kylli shaphang ka jingsahteng ka bai thied bording ka Jylla na kiwei ki kompani kum na ka NEEPCO bad kiwei, u Mondal u la ong ba ka jingbym lah ban siew dep ïa ka bai bording ilektrik kaba thied na ki kompani kam dei kaba mad da ka Jylla tang mynta, hynrei ka dei kaba la don la bun snem bad ym lah ban weng mar mar ïa kane ka jingeh.
Kumta u la ong ba ka Sorkar Jylla ka don ka thong ban wad ki lad ki lynti kumno ban pynbha ïa ka rukom treikam khamtam eh ban pynhiar ïa ka jingduhnong jong ka tnat bording bad ka MeECL lyngba ki lad ki lynti kiba yn sa shim.
U Mondal u la ai khublei ïa u Myntri Rangbah u Conrad K Sangma uba la ai mynsiem bha kumno ban pynbha ïa ka rukom treikam bad kumno ban lah ai ka jingshakri ïa ki paidbah.
Shuh shuh u Myntri u la ong ba kum u Myntri uba khmih ïa ka tnat bording un trei shitom ban wad ki lad ki lynti ban weng ïa ki jingeh kiba ka tnat bording ka mad.
