Shillong, Lber 16:
Ki nongïalam ka Meghalaya State Olympic Association (MSOA) ki la leit ïakynduh ïa u Myntri thymmai ba khmih ïa ka tnat ïalehkai u Bah Shakliar Warjri bad kane ka long hadien shi taïew ba u la shimti ïa ka kam.
Ha kane ka jingïakynduh kaba nyngkong hapoh ka kamra treikam ka jong u, kitei ki nongïalam ka MSAO ki la ïakren halor ki prokram kiba la treilang hapdeng ka tnat ïalehkai kane ka synjuk.
Nalor kiwei kiwei ki kam la pyntip ruh ba katkum ka riti pynïaid jong ka synjuk, u Myntri ka tnat ïalehkai un long ruh u ex-officio President jong ka Meghalaya State Olympic Association.
U Working President ka MSOA u Bah John F. Kharshiing, bad u Bah Finely L. Pariat, General Secretary, ki la ïawer ïa uteii u Myntri ban pynlait por khnang ban wan ïuhkjat ha ka shlem treikam jong ka MSOA khnang ban ïoh ïakren bniah bad ban ïakynduh lang ïa baroh ki President, Secretary jong ki synjuk ïalehkai bapher bapaher kiba don hapoh ka shatri jong ka MSOA.
Kumta u Bah Shakliar u la mynjur ban wan sha katei ka shlem treikam ka MSOA ynda la kham lait por ynda la kut ka dorbar jong ka Meghalaya Assembly.
Ha katei ka jingïalang la ïa don lang ka Kong Matsiewdor War Nongbri, Vice-President MSOA & President ka Meghalaya Archery Association, Bah Paia War Nonsgbri, Secretary ka Meghalaya Archery Association, Bah Dipshon Ryntathiang, Bah P. Laloo, Bah E.H Passah, Executive Council Member ka MSOA kynthup u Ian Campbell (Olympian) bad kiwei.
