Guwahati, Lber:
U Myntri ka Sorkar Assam, u Atul Bora ha ka Sngi Balang mynta ka taiew u la pyntip ha Ïing Dorbar Thaw Aiñ ba ka kat kum ka kaiphod ba la ïoh na ka Assam Accord, la lap ba ki don palat 1.50 lak ki nongwei kiba la wan ban shong ban sah beaiñ (illegal immigrant) ha Assam bad palat 30,000 ngut na kitei la beh bad pynmih noh na ka jylla Assam.
Haba ai jubab hadien ka jingshah kylli jingkylli ha u MLA ka AGP – Ramendra Narayan Kalita, na ka liang u Myntri u ba dei khmih ïa ka jingpyntreikam ïa ka Assam Accord – Atul Bora u la pyntip ba ki la don haduh 1,53,129 ngut ki nongwei kiba la wan ban shong ban sah beaiñ ha ka jylla Assam; bad ïa katei la lap lyngba ka Foreigners Tribunal (FT).
U Myntri u la pyntip shuh shuh ba na kitei ki 1.50 lak ngut ki nongwei – 32,193 ngut ki la wan ban shong ban sah ha ka jylla Assam hashwa u snem 1971 bad 1,20,936 ngut pat kiba la wan ban shong ban sah ha Assam hadien u snem 1971.
Haba ai jingkren ha katei ka sngi, na ka liang u Myntri u la ïathuh ruh ba ki la don haduh 30,067 ngut ki nongwei ne ki bar ri kiba ka sorkar Assam ka la leit ban pynphai ïing noh ïa ki.
Kat kum ki kyndon jong ka ‘Assam Accord’, la ïathuh ba ïa ki kyrteng jong ki nongwei kiba la wan ban shong ban sah ha Assam ha lane hadien ka 25 tarik u Lber, 1971 yn weng bad pyndam noh ïa ki kyrteng na ka thup nongthep ‘vote’ jong ka jylla bad yn shim ruh ïa ki sienjam na ka bynta ban leit pynphai noh ïa ki sha ki ri kiba ki dei ki nongshong shnong ba tynrai.
Halor ki mat kiba ïadei bad ki kam ker sainar shiah ha ki khappud ba marjan bad ka ri Bangladesh, na ka liang u Myntri u la pyntip ba tad haduh kane ka kynti ba mynta la lah ban pyndep ïa 98.5%. U la ïathuh shuh shuh ba na ka daw jong ka jingdon ki jingujor na ka tnat shipai Border Guard Bangladesh (BGB), ïa ki kam ker sainar shiah na ka bynta 4.35 km ka lynter khappud ha ka thaiñ Cachar-Karimganj ym pat shym la lah ban pyndep.
U Myntri u la ïathuh shuh shuh ba ïa ki kam sainar shiah na ka bynta 6.11 km ha ka thaiñ Dhubri-Mankachar ym pat shym la lah ban pyndep namar ki dei ki jaka them.
