New Delhi, Lber:
Ka Residents Welfare Association jong ka Delhi ha ka thaiñ Rajouri Garden ki la pynlong da ka jingïakhih ha ka sngi Balang ban pyrshah jur halor ka jingnang bun ki jingjia jong ka jingshah dait ksew jong ki briew ha ka nongbah bad ha kylleng ki jaka jong ka ri.
Kumba la ïathuh ka kaiphot ba la ïohlum, la ong ba ki la don kumba 58,000 tylli ki jingjia jong ka jingshah dait ksew ki briew ïa kiba la ïoh jingtip ha kine ki hynriew bnai na ki ar tylli ki hospital ka Dr Ram Manohar Lohia bad Safdarjung Hospital. U Myntri barim jong ka jylla u Vijay Goel u la ong, “Lada ngi khmih bniah ha baroh ki hospital, kata da ki lak tylli ki jingjia yn sa ïoh ban lum jingkheiñ ha kaba ïadei bad ka jingdon jong ki briew kiba la shah dait ha ki ksew. Kumba la antad, la ong ba ki la don kumba 10 haduh 12 tylli ki jingjia jong ki jingshah dait ksew jong ki briew haman ka kynta. “
U Goel u la pynshisha da kaba ong ba ha u snem 2019, ka sorkar Kejriwal ka la thaw da ka kynhun ka ban khmih bniah ha kaba ïadei bad ki jingeh kiba la mih na ka jingdon jong ki ksew hapoh ka jingïalam jong u Somnath Bharti. Ha kaba ïadei bad kane, u Goel u la ong ba ïa ka jingpyntreikam ïa kane ka kynhun ym pat sdang haduh mynta. “Lada ba ka sorkar ka shim khia halor kane, kata ka jingdon jong ki ksew shang surok kan jin da la lah ban tehlakam ha ki saw snem,” u la bynrap.
Ka jingtieng jong ki briew ïa ki ksew ka la mih hadien ki jingïai bteng jong ki jingjia shah dait ksew jong ki briew ha kaba ka la nang kiew katba nang mih ki sngi. Ka jingdon jong ki ksew shang surok ka la nang kiew. Kumba la sakhi, la ong ba ki ksew ki ju dait ïa ki khynnah, ki briew kiba ïaid ha ki lynti ïaid kjat bad ki jaka shongkai pyngngad.
Dang shen ki la don arngut ki khynnah kiba dei shipara kiba don ha ka rta kaba 5 snem bad 7 snem kiba la ïap hadien ba ki la shah dait bad shah patar ha ki ksew shang surok, kane ka la jia ha ki ar tylli ki jingjia, ha kaba ki sngi ba ki la shah thombor ki la ïajngai tang hapoh ki khyndiat sngi.
