Shillong, Lber 16:
Ka Central Library, NEHU, Shillong ryngkat ka jingïatreilang bad ka Indian Association of Special Libraries and Information Centres (IASLIC), Kolkata ha ka Sngi Palei ka la pynlong ïa ka IASLIC National Seminar kaba 29 ha Multi Use Convention Hall, NEHU Campus.
Ïa katei ka seminar la wan ban plie da u MP ka Rajya Sabha u Dr. WR Kharlukhi kum u kongsan ha ka jingïadonlang u Prof. Prabha Shankar Shukla, Vice-Chancellor, NEHU bad kiwei kiwei.
U Abhijit Kumar, General Secretary, IASLIC u la ai ka jingkren maitphang halor ka seminar bad la ïoh ruh ïa ka jingkren na u Prof. Sanjay K Singh, Vice President, IASLIC Zone 5.
U Dr. WR Kharlukhi, u la pyllait paidbah ïa ka Souvenir bad u la pyntip ruh ba yn sa tei ïa ka shlem Ri-kynti (Museum) ha ri-lum Garo bad u la pynpaw ba dei ban pan jingmut na ka Central Library, NEHU, Shillong ban lah pynurlong ïa katei ka jingthmu.
U la ai jingmut ruh ïa ka Central Library, NEHU ban phah ïa ka jingtyrwa sha ka tnat DoNER ban sdang ïaka projek Digital Archive halor ki jingnang jingtip ka jylla Meghalaya bad ka Thaiñ Shatei Lam-mihngi khnang ba kan ai jingmyntoi ïa ka jylla bad ïa ka thaiñ baroh kawei kaban long ruh ka jingïarap ha ka kam jngohkai.
Ha kane ka sngi la sam ruh ïa ka IASLIC Special Award sha ka T. Padmavathi, Pr. Tech Officer, FOSTIS/Library CSIR-Central Food Technol. Res. Institute (CFTRI), halor ka jingithuh ïa ka jingai jingshakri kaba radbah ka jong ka.
Nalor kane, ki heh ki haiñ ki la ïashimbynta ruh ha ka thung ïa ki dieng hajan ka Multi-Use Convention Hall.
