London, Lber:
Ki nongiakhun ha ka jingiathong ka jong ki na ka bynta ban ioh thied ia ka klob ialehkai phutbol ba paw na London ka Manchester United, ki lah ioh ia ka jingpyntip na ka bynta ban wan sha ka miej iakren bad iamir jingmut halor katei ka kam ha ka madan ialehkai jong katei ka klob ialehkai phutbol ha ka lympung Premier League ha Old Trafford ha kane ka taiew ba mynta.
Kumba ka paw mynta ka long ba ka ‘Glazer Family’ kaba la long ka trai jong ka klob baroh kawei, ka lah dep ha ka ban pynbna ha u Naiwieng ia ka jingpynkhreh jong ka ha ka ban pynlong ia ka jingkhmih bniah biang sa shisien ia ki kot ki sla ba ka lah ioh pdiang na ki nongiakhun kiba ialeh ban ioh thied ia ka klob baroh kawei; hadien ba katei ka trai jong ka klob ka lah pynbna pyrthei ia ka jingpynkhreh jong ka ban die noh ia katei ka kynhun ialehkai sha kiwei pat kiba jop ia ka hok ha ka jingiathong ka jong ki.
Shuh shuh ruh u heh spah na ka ri Qatar u Sheikh Jassim Bin Hamad Al Thani bad u heh saipan na ri Bilat u Jim Ratcliffe ki long kiba lah wanrah shakhmat ia ka jingiathong ka jong ki na ka bynta ban ioh kam trai ia katei ka klob ialehkai ba pawnam ha ka pyrthei.
Kumjuh ruh u Sheikh Jassim u don ia ka jingthmu na ka bynta ban ioh pyniaid pura (100%) ia ka klob baroh kawei bad ba lah ioh ruh ia ka jingshah khring ha ka jingioh jingkyrshan na ki katto katne ki paidbah ba shitrhem jong ka klob, ha kaba utei u heh spah u lah kular hakhmat jong kiba bun na ka bynta ban rat dienkhong noh ia ka ram-ka-shah ba ka klob ka kit mynta.
Kumjuh ruh INEOS kompani jong u Ratcliffe uba long u nongkyrshan ba shitrhem ia ka klob naduh dang khynnah, u wad ki lad ki lynti na ka bynta ban ioh ia ka jingpyniaid kaba pura da ka jingioh jingkyrshan na kiba bun da kaba thied ia ka jingiathong ba lah wanrah shakhmat da ka Glazers.
Haduh mynta kam shym la don kano kano ka jingiathong kaba lah ban pynhun bad pynkohnguh ia katei ka trai kaba dang pyniaid mynta ia ka klob hadien ba ka lah buh hakhmat ki nongiakhun ia ka dor kaba £6 billion ($7.2 billion). Shuh shuh ruh ka Elliott Investment Management ka long mynta kaba lah jam sha kawei pat ka bynta jong ka jingiathong.
Kumba ka paw mynta ka long ba ka ‘Glazers Family’ ka lah tynrong ia ka ram-ka-shah kaba bun ha ka klob baroh kawei bad ruh kaba lah dep ha ka ban kyntait ia ki bynta ba kongsan tam eh jong ka klob na ka bynta ka lawei ka jong ka bad ka jingjop ha u bnai ba lah dep da ka klob ha ka League Cup ha Wembley ka long ka trophy jingjop ba ka kynhun ka la lah ban khur na ka bynta ki hynriew snem.
U Ratcliffe uba kynjoh mynta sha ka rt aba 70 u lah long lypa mynta u trai jong kawei na ki klob ialehkai ha ka French Ligue 1 ka Nice bad ruh ia ka kynhun ialehkai na Switzerland ka FC Lausanne-Sport.
