Khliehriat, Lber 16:
Ki pulit ka East Jaiñtia Hills District ki la ïoh kem biang ïa 3 ngut ki nongkhaïi kynja bad kurup haduh 161 kilo u kynja na kitei ki briew.
Ki pulit ka Umkiang PP ha ka por 3.35 mynsngi ki la pynlong ka jingkhynra kali ha Damcherra, Kuliang, bad ki la ïoh bat ïa kawei ka kali Honda City kaba don ïa u number AS06-V-8941.
Ki pulit ki ïathuh ba haba khynra ïa kane ka kali, la lap ïa u kynja uba khia haduh 84 kilo uba la song bha bad buhrieh hapoh kali.
Haba ïa dei bad kane ka jingjia, ki pulit ki la kem ïa u nongñiah uba la tip kyrteng kum u Laxmindar Gour na Narendrapur, Tripura bad la pynngat mukotduma ïa u ha Lumshnong PS hapoh ka Case No. 12(3)2023 u/s 20(b)(ii)(c)/29 NDPS Act.
Ha kajuh ka sngi ha ka por 6:45 baje janmiet ki pulit ka Umkiang PP haba khynra kali ha kajuh ka jaka, ki la ïoh bat ïa kawei ka kali Mahindra KUV 100 kaba don ïa u number AS12-P-2301 bad napoh kane ka kali la lap ïa u kynja ba khia 77 kilo uba la song bad buhrieh hapoh ka kali.
Na kane ka kali, ki pulit ki la kem noh ïa u Md. Hachan Mia 37 snem na Latugoan, Tripura bad u Mid. Ajir Hosen 35 snem na Palgoan Tripura.
La kurup ruh ïa ar tylli ki mobile phone na kitei lai ngut bad ki pulit ki la pynlong ka jingtohkit ban lap shuh shuh ïa kiba donkti.
