Itanagar, Lber:
Ki bor sorkar jong ka jylla Arunachal Pradesh ha kane ka taiew kaba mynta ki la pyntip ba haduh 6 ngut ki sub-inspector (SI) jong ka tnat pulit ka jylla kiba dang don hapdeng ka jingshah ai jinghikai kilan met ha North Eastern Police Academy [NEPA], Meghalaya ki la shah weng kam noh ha ka 3 tarik mynta u bnai na ka daw jong ka jingdon bynta ka jong ki ha ka jingjia lait tuh jong ki jingkylli eksam ba la pynlong da ka Arunachal Pradesh Public Service Commission (APPSC).
Halor katei ka mat, na ka liang ki bor sorkar jong ka jylla ki la ïathuh ba kitei ki 6 ngut ki dei kiba la shah kem shwa ha ka taïew ba nyngkong jong u bnai Kyllalyngkot, 2023 na ka daw jong ka jingdonkti jong ki ha ka mokotduma SIC/VIG/PS/FIR-12/2022.
Kat kum ki jingïoh lum khubor la ïathuh ba da kaba bud thik ïa ka hukum ba la pynmih na ka shlem trei kam jong u Director General of Police, u Assistant Inspector General of Police – Singjatla Singpho u la weng kam noh ïa kitei ki 6 ngut ki pulit da kaba pynngat ruh hapoh ki kyndon bapher bapher jong ka IPC.
Ki 6 ngut ki pulit SI kiba la shah weng kam ki kynthup ïa u Yon Talom, Pakjum Gamlin, Jembang Darang, Kangkeng Garu, Kaling Jerang bad u Kali Yomcha.
Baroh kitei ki 6 ngut ki la ïoh ïa ka kam sub-inspector ha ka 22 tarik u bnai Lber, 2022.
Halor katei ka jingjia lait tuh jong ki jingkylli eksam ba la pynlong da ka APPSC la ïathuh ba na ka liang ka Central Bureau of Investigation (CBI) ha ka 13 tarik mynta u bnai ka la dep ruh ban pynrung da ka ‘chargesheet’ pyrshah ïa 2 ngut ki briew kiba la don bynta ha ka mokotduma kaba ïadei bad ka jingjia lait tuh jong ki jingkylli eksam. Ha katei ka sngi, na ka liang ka CBI ka la pynrung da ka ‘chargesheet’ pyrshah ïa u Taket Jerang bad ïa u Obur Jerang ha Yupia District Session Court, Arunachal Pradesh.
Kat kum ki jingïoh lum khubor la ïathuh ba dei ha u bnai Risaw, 2022 ba ka CBI ka la pynrung ïa ka mokotduma halor katei ka jingjia lait tuh jong ki jingkylli eksam ba la pynlong da ka APPSC. Ki jingkylli kiba la lait tuh ki dei na ka bynta ka kam Assistant Engineer (Civil) ba la pynlong da ka APPSC ha ka 26 bad 27 tarik u Nailar, 2022.
