New Delhi, Lber:
Ka seng BJP ha Delhi ka la rai ban pynkhlaiñ ïa ka jingïakhih pyrshah ïa ka sorkar u Arvind Kejriwal kaba la shah kynnoh donkti ha ka kam bamsap kaba la mih na ka jingpyndkoh treikam ha kaba ïadei bad ka jingkhmih bniah halor ka kyiad da kaba pynlong ïa ka jingïalap paidbah haman ki thliew ïing.
Ka seng BJP ka la thmu ban pynsngewthuh ïa ki briew shaphang kane ha ki ïew bad ha ki jaka sangeh kali kiba don ha kylleng ka nongbah, la ïathuh ki heh nongïalam jong ka seng ha ka sngi Balang. Ki la ong ba ka seng ka la rai ban pynlong ïa ka jingïalap paidbah kaba la sdang naduh ka 16 tarik, Lber bad ka ban sa bteng haduh ka 26 tarik, Lber.
U Myntri Rangbah u Kejriwal u la donkti ha ka kam bamsap lyngba ka rukom pyntreikam halor ka kyiad, la pynshisha u nongïalam jong ka liang pyrshah ha Delhi Assembly u Ramvir Singh Bidhuri, ha kaba u la ïai ban da kaba ong ba ka seng BJP kan sa ïai bteng ha ka ban ïakhun haduh ba u Kejriwal un hiar na ka shuki. Ki nongïalam jong ka seng BJP bad ki nongbud jong ka ki la pynlong ïa ka jingïakhih ha Jantar Mantar bad ïakhih pyrshah ruh hapoh ïingdorbar bad ki Myntri ka seng AAP ki la dawa ïa ka jinghiar shuki jong u Kejriwal, la ong u General Secretary jong ka seng BJP ha Delhi u Kuljeet Chahal ha ka jingai jingkren ha ka jingïalang bad ki nongthoh khubor.
Ka seng BJP ka la ïai bteng ban kynthoh ïa ka sorkar AAP halor ka jingdonkti ha ka kam bamsap ha kaba ïadei bad ka Delhi Excise Policy na ka bynta u snem 2021-22. Ïa kane ka jingpyntreikam la weng noh da ka sorkar AAP ha u snem ba la lah hadien ba u Lieutenant Governor u VK Saxena u la hukum ïa ka kynhun Central Bureau of Investigation ba kan pynlong ïa ka jingtohkit kaba bniah halor ka jingbym pyntreikam hok ha kane ka jingpyntreikam. U Symbud Myntri Rangbah barim jong u Kejriwal u Manish Sisodia, uba long uwei napdeng kiba la shah kynnoh donkti ha ka jingmudui jong ka kynhun CBI halor ka jingdonkti ha ka kam bamsap, u la shahkem ha ka kynhun Enforcement Directorate ha ka taïew ba la lah.
