Shillong, Lber 17:
Ka Kynhun Myntri ka Sorkar Jylla ka la ai jingmynjur ban thaw noh da ka skulbah kaba dei jong ka Jylla lane ka State University da kaba shu pynkylla na ka Captain Williamson Sangma Technical University kaba la dep don lypa da ka aiñ naduh u snem 2011.
Haba ïathuh ïa ka rai kaba la shim da ka Kynhun Myntri ha ka sngi Thohdieng, u Myntri Sorkar ba dei ruh u nongaiktien ka Sorkar MDA-II, u Bah Paul Lyngdoh u la ong ba ka Technical University ka dei kaba la dep ban mynjur da ka aiñ naduh u snem 2011 bad kane ka jaka pule ka dei ban don ha Tura.
Kumta ban pynkylla sha ka State University, donkam ban pynkylla biang ïa ka aiñ kaba la don, ha kaba ka Kynhun Myntri ka la mynjur ïa ka Amendment Bill ka ban sa wanrah ha ka Dorbar Mang Tyngka jong ka Ïingdorbar Thawaiñ ka ban sdang naduh ka 20 tarik mynta u Lber.
Khnang ban pynkylla sha ka skulbah jong ka Jylla, ka Sorkar MDA-II ka la pynkhreh ban wanrah ïa ka Amendment Bill lane ka aiñ-rew na ka bynta ban pynkylla ïa ka Captain Williamson Sangma Technical University Act, 2011 sha ka State University.
Haba kylli la ka jingpynkylla ïa katei ka Technical University sha ka State University ka dei pynban tang ka jingpynduhlad ïa ki khynnah ban ïakhun ïa ka Common University Entrance Test (CUET), u Bah Paul u la ong ba ha ka synshar paidbah donkam ban sngap ïa ka sur kiba bun, bad kam lah satia ban long beit katkum ka jingpyrkhat marwei ne tang shi lynti.
Halor ka jingkylli, naduh lano ki kolej ha Meghalaya kiba ju pynïasoh bad ka skulbah North Eastern Hill University (NEHU) kaba dei ka skulbah jong ka Sorkar Pdeng kin ïasoh noh bad kane ka skulbah jong ka Jylla, bad kim donkam ban ïakhun ïa ka CUET, u Bah Paul u la ong ba hadien ba la skulbah ka la treikam, kine ki kolej ha Meghalaya ruh kin ïasoh bad kane ka skulbah jong ka Jylla.
Haba kylli katno ka jingheh jong ka jaka ka don na ka bynta ban tei ïa kane ka skulbah bad balei ym shym la buh ïa kane ka skulbah ha Shillong kaba dei ka nongbah jong ka Meghalaya, u Bah Paul u la ong ba ka jaka kam pat dei kaba biang ïa mynta, bad kumba ka long naduh basdang, kane ka skulbah ka dei kaba la don lypa ha Tura.
Kum ban pynkynmaw, ka Meghalaya kam pat don ka skulbah kaba dei jong ka Jylla, lait noh tang ki skulbah shimet kiba wan seng kham bun da ki riewshimet nabar ka Jylla.
Kumta ynda la pynkylla ïa ka Captain Williamson Sangma Technical University da ka aiñ, yn tip kum ka Captain Williamson Sangma State University bad kane ka dei ka skulbah kaba nyngkong eh jong ka Jylla.
