Shillong, Lber 16:
Ka Ïingbishar (Meghalaya High Court) ha ka sngi Thohdieng ka la hukum ïa ki mamla (parties) ban pynbeit noh hapoh jong u Ïaïong mynta u snem, khnang ba kano-kano ka jingpynkynriah kaba dei ban jia ïa kiba sah ha Them Metor ka dei ban long noh hadien ki ar lane lai bnai.
Kane ka hukum la pynmih da ka ïingbishar (Meghalaya High Court) lyngba ki ar ngut ki nongbishar, kiba kynthup ïa u Chief Justice, Sanjib Banerjee bad u Justice W Diengdoh, haba ïadei bad ki mukotduma hapdeng ka Sorkar Jylla bad ka Harijan Panchayat Committee.
Ka hukum na ka ïingbishar ka la wan hadien ba ka Sorkar Jylla ka la ai por ïa ka Harijan Panchayat Committee ba kan aiti ïa ka jubab hapoh ka 10 tarik Ïaïong, ha kaba ïadei bad ka jingtyrwa ban pynkynriah ïa 342 tylli ki longïing na Them Metor, Them Ïew Mawlong sha ka jaka ka Shillong Municipal Board (SMB).
Ka ïingbishar ka la ong ruh ba na ka Sorkar Jylla ka la ai por ïa ka HPC haduh ka 10 tarik Ïaïong, 2023 ban jubab haba ïadei bad ka jingtyrwa jong ka Sorkar.
“Baroh ki mamla la kyrpad ba ki dei ban pynbeit noh ïa kane ka kam hapoh jong u Ïaïong mynta u snem, khnang ba kano-kano ka jingpynkynriah kaba dei ban jia ïa kiba sah ha Them Metor ka dei ban long noh hadien ki ar lane lai bnai bad kane ka dei ban kut bad kynja noh,” la ong ka ïingbishar.
Kum ban pynkynmaw, u Symbud Myntri Rangbah ka Jylla u Bah Sniawbhalang Dhar uba peit ïa ka tnat Pynroi Sor, u la ong ba ka Sorkar ka la dep aiti ïa ka saiñdur (blueprint) halor ka jingtyrwa sha ka HPC ha kaba la aipor ba kin jubab haduh ka 10 tarik Ïaïong, 2023.
U Bah Sniawbhalang u la ong ba ïa kane ka jingbthah kaba la shim da ka sorkar ka long hadien ba ka HPC ka la pan por lai bnai ban ai jubab ïa ka jingtyrwa ka sorkar.
“Na ka liang ka Sorkar, ngim shym la mynjur satia ïa kane ka jingkyrpad jong ki ban ai por haduh lai bnai bad ngi la rai ban ai por ïa ki tat haduh ka 10 tarik Ïaïong ba kin jubab,” la ong u Bah Sniawbhalang.
Kum ban pynkynmaw, ka jingdawa ban pynkynriah ïa kiba sah ha Them Metor ka dei kaba khlem urlong bad sahteng da ki phew snem. Dei ha u snem 2018 ba ka Sorkar MDA ka la sdang ban shimkhia ïa kane ka jingeh ban pynbeit noh, bad mynta ka kam ka la nang ïaid shakhmat.
