New Delhi, Lber:
Kumba la sakhi, la ong ba ka jingktah jong u khñiang jingpang H3N2 ka la nang kiew katba nang mih ki sngi. Haba la khmih bniah na kane ka jingkiew jong kiba shah ktah ha u khñiang jingpang, ka sorkar kmie ka la bthah ïa ki jylla ba ki dei ban long kiba husiar bha.
Kane kam dei ka sien kaba nyngkong ha kaba la ïoh jingtip halor ka jingktah jong u khñiang jingpang, hynrei ha kane ka sien kaba mynta, une u khñiang jingpang u la long uba kham shyrkhei.
Ki briew kiba shah ktah ha u khñiang jingpang H3N2 ki ju ud shitom ha ka ban ring bad pynhiar mynsiem, ha kaba kane ka ju wanrah ïa ka jingïap jong ki ha kiba bun ki jingjia.
Haduh mynta, ka Delhi, Gujarat, Maharashtra, Karnataka, Bihar, Haryana, Assam, Goa, ki Union Territory ki dang shah ktah jur ha u khñiang jingpang.
Ki la don ruh kiba la ïoh ïa ka jingpang ha Puducherry. Ka Maharashtra bad ka Puducherry ki la don ïa shibun ngut kiba la ïoh ïa u khñiang jingpang H3N2.
Ki la don arngut ki briew kiba la ïap na ka jingshah ktah ha u khñiang jingpang H3N2 ha Maharashtra. Kiba bun ki nongpang kiba la shah ktah ha une u khñiang jingpang ki dang shah sumar ha ki jaka ai jingsumar.
Ki la don baroh 352 ngut kiba la shah ktah ha ka jingpang Swine Flu bad H3N2 ha Maharashtra. Na kine, ki la don kumba 58 ngut ki nongpang kiba la shah ktah ha u khñiang jingpang H3N2.
Ki la don 32 ngut ha Mumbai. Na kine ki 32 ngut ki nongpang, 4 ngut ki dei kiba la shah ktah ha u H3N2 bad 28 ngut ha u H1N1.
Ki Chief Secretary jong baroh ki jylla bad ki Union Territory, ki la shah bthah ba ki la dei ban long kiba khmih bniah bad husiar bha.
