Raphael Warjri
Ka thong kaba ha phrang tam eh ia ki sengbhalang bad ki seng saiñpyrthei mynta ka long ban thaw ki lad ki lynti na ka bynta ban tehsong shitylli ha kawei ka lyngwiar baiar ka ban kdup naphang lin ia ki paidbynriew salonsar ki ba dei ki trairi traimuluk jong ka Bri Hynñiewtrep. Lehse ka long kaba kham suk ia ki sengbhalang ban tehsong, namar ba ki seng saiñpyrthei ki dei ban kynthup satlak ka jylla, wat lada kheiñ tang ia ki seng riewlum. Ha kajuh ka rukom ka long kaba jynjar ban khmihlynti ba ka jingpyrshang ban tehsong kan lah ban jia noh mar mar, namar ka dei ban shim hi la ka pali katkum ka por ban wanlam kita ki mat ba kyllum kiba lah ban pdiang lang da baroh ki para seng. La kumno kumno shwa ka san snem ka la biang hi ka por ban pynkhreh lypa naduh mynta khnang ban poi sha ka thong. Ha ba khmih bniah la shem ba ki seng riewlum ki sule hi tang ha Ri Khasi namar ba ha thaiñ Garo ki don tang ki sengheh ba Shityllup-Ri (national parties) namar ka seng riewlum GNC ruh ka la sdang dam, khlem lah ban pynmih wat tang uwei u kyrtong. Nalor kata ki don ki jaka ba ki jylli-synshar ki dei ki ba la mihkhmat barabor da ki dkhar ha Rilum Garo. Kane hi ka pynskhem ba wat ka UDP ka ba dang ñiew kum ka seng ka kynthup satlak ka jylla, hynrei ym don tynrai shuh ha thaiñ Garo. Kiwei kiwei lei lei ki dei kiba sule kam tang ha Ri Khasi bad ka HSPDP lei lei ka la kam ban iakhun na ka bynta ka Jylla Khasi Jaintia. Ha kajuh ka rukom ruh ka VPP ruh ka shai kdar ba ka thew beit tang ha Ri Khasi ban pynskhem la ka nongrim.
Ban bah kat kata ka lyngkor na ka bynta ban tehsong ia ki sengbhalang ne ki seng saiñpyrthei la donkam da ki simpah simsong ki ba dapshynrang dapkynthei bad kiba lah ban kdup ha la shadem ia baroh ki sengbhalang lane ia baroh ki seng saiñpyrthei riewlum. Haduh kane ka khyllipmat ym pat don mano mano ba lah ban bah ia kata ka lyngkor namar manla ki riewkhmat kumba paw ha ka imlang sahlang ki dei kiba shah liang lypa lane ki ba tyngkan ban mih pyrthei. Lada don rangbah kum u Sohblei Sylvanus Sngi Lyngdoh bad samla kum u Bah H S Shylla ha kata ka snem 1978, lehse dang don jingkyrmen ban khmihlynti ia ka jingkyrmen ha ka lawei. Ai ba kane ka jynthoh kan long kum ka antor ka ban pathai sha satlak ka Ri Khasi na ka bynta ban kynto ia kino kino ki rangbah ne samla kynthei ne shynrang ki ba sngewkhia ia kane ka phang ban kin shah shkor bad shim kum ka jingkhot kaba dawa na ka bynta ka bha ka miat jong ka imlang sahlang ha jylla. Kita ki rangbah ki lah ban long ruh kum ki ksiang ki ban lape bad syrdep ia kano kano ka bynta ba iakhing ban byrshem bad ia ka daw bah jong ka jaitbynriew kan iaineh kumba buh thong kyllum baroh ki seng riewlum. Kumta ka bynta ba kongsan ha kane ka khyllipmat ka long ban wad ban thwet ia kita ki riew rangbah ne samla ba lah iaw pyrkhat bad ba don ka kyrdan ban kdup ha la shadem ia baroh ki khlieh rangbah jong ki seng saiñpyrthei khamtam jong ki seng riewlum. Shisien pyrkhat ym pat lah ban kdew ne shem kum kita ki rangbah ne samla ki ba lah ban long ksiang lane ban kdup lang ia baroh ki khlieh rangbah jong ki seng saiñpyrthei bad ha kajuh ka por ia ki sengbhalang ruh kumjuh. Da kano ka lynti ban kdup bad tehsong shitylli tang kawei ka shong ha ka jingstad jong ki para rangbah lyngba ka tainia bad ka teinia ban poi sha kata ka thong.
Napdeng ki rangbah ki ba lehse lah ban kdew ki dei ban long ki ba sngewthuh ia ka synshar khadar, ka aiñ bad ki ba iengpdeng khlem shah liang sha kano kano ka seng saiñpyrthei ne kano kano ka jaitbynriew. Ki dei ban long da ki rangbah Khasi lada lah ban nam kum i Bah Toki Blah, Bah P. Barcos O. Warjri, Bah River O. Wahlang bad kiwei kiwei namar ba ki long ki ba don burom, kiba la jemnud, kiba shemphang, bad kiba khraw ka nam bad ka longrynñieng ha ka imlang sahlang bad khamtam eh ki ba khlem pat thohbria ha kano kano ka liang. Lada kum kine ki rangbah ki kloi ban mih madan na ka bynta ka daw jong ka imlang sahlang, te ka jingkyrmen ia ka lawei ka lah ban urlong.
Ha kaba iadei bad ki samla ha kane ka khep mynta la kham jwat ban shem namar katto katne kiba lah ban nam ki la iasnoh bad ka seng VPP bad ha kane ka bynta dei ban iaroh ia ka seng ka ba la kyrsoi ka jingshaniah ba ki samla ki shlan ban rung dkhot bad iakhun kum ki kyrtong ha ka jied-lamkhmat sha dorbar thawaiñ. Lada shu kdew ruma rutit, ki arngut ki samla, lehse u samla Kitkupar Shangpliang bad Daniel Stone Lyngdoh Nonglait ki ba khlem don kano kano ka jingiasnoh bad kino kino ki sengbhalang ki lah ban kit kum kata ka lyngkor lada shah ka khep ba kin shimti. Kane ka long kum ba shu pashat jingmut, hynrei ym dei ba kynshoit iano iano namar ba ka jingsngewkhia ka long ia ka imlang sahlang ha jylla bad ia la ka jaitbynriew. Nalor kine don ruh katto katne ki samla ba kham pawnam ha ka imlang sahlang na salonsari NEHU bad MLCU ki ba tbit bad proh jabieng ban shimti kum kane ka lyngkor lada ki kloi ban mih pyrthei.
