Aizawl, Lber:
Ki bor pahara jong ka jylla Mizoram ha ka 16 tarik mynta u bnai ki la pyntip ba ki la ïoh ban kem ïa 2 ngut ki runar ha ryngkat katto katne tylli ki tiar siat. Ïa kitei ki runar la ïoh ban kem hadien ba ki bor shipai Assam Rifles ha ryngkat ka jingïatreilang bad ki bor pulit ka Special Branch (CID) jong ka jylla Aizawl ki la leit ban pynlong ïa ki jingkhynra ha Chite Veng, Aizawl.
Ki tiar siat kiba ki bor pahara ki la ïoh ban kurup ha katei ka sngi ki kynthup ïa 2 tylli ki .22 pistol, 4 tylli ki kuli .22 bad 2 tylli ki ‘magazine’ jong ka .22 pistol. Ki bor pahara ki la pyntip ba ki la ïoh ruh ban kurup ïa kawei ka thuk thuk Royal Enfield kaba la pyndonkam da kitei ki 2 ngut ki runar. Ïa ki 2 ngut kiba la shah kem ha katei ka sngi lem bad ïa ki tiar siat ba la ïoh kurup la leit ban aiti noh sha ki bor pulit ka Bawngkawn PS na ka bynta ban pynsdang ïa ki kam tohkit kiba sah.
Haba phai sha kawei pat ka khubor, na ka liang ki bor pahara ka tnat shipai Assam Rifles ki la pyntip ba ha ka snig Balang kaba la dep da kaba ïatreilang bad ki bor sorkar ka tnat Customs ki la ïoh ban kurup ïa haduh 110 byrni u kwai ba la wan ban pynpoi beaiñ sha Mizoram na Myanmar. La ïoh ban kurup ïa utei u kwai na ka shnong Zote, Champhai District – ka thaiñ kaba don markhap bad ka ri Myanmar. U kwai u ba ki bor pahara ki la ïoh ban kurup ha katei ka sngi u shongdor haduh T.61.6 lak.
