Shillong, Lber 17:
U Myntri ka Sorkar Jylla, u Bah Paul Lyngdoh u la ong ba ka jingmih ban kam ïa ki jaka ha khappud da ka Assam kum ka Mukroh bad kiwei pat ki jaka, ka dei namar bym pat pynbeit ïa u pud u sam, bad u la ïathuh ba ka jingïakren pynbeit pud ha ka wat ba-ar la kumno kumno ka dei ban sdang biang hadien ka Dorbar Mang Tyngka jong ka Ïingdorbar Thawaiñ.
U Bah Paul, uba dei ruh u nongaiktien ka Sorkar MDA-II, u la ong ïa kane haba jubab ïa ka jingkylli ki nongthoh khubor ha ka sngi Thohdieng, halor ka nongrim ba ka Meghalaya ka ïeng namar ka jingkam ka Assam lyngba u Myntri Rangbah u Himanta Biswa Sarma ba ka Mukroh ka hap hapoh u pud u sam jong ka Assam.
U Bah Paul u la ong ba mano-mano ruh lah ban kam da kaba kren ktien, hynrei ka bynta kaba kane ka Sorkar ka don, ka long ban pyni mano ba long trai ïa ki jaka, bad ban leh ïa kata, donkam ïa ki kot ki sla, namar ban shu kam kumto ka long kaba suk, hynrei kaba donkam ka long ban pynkhlaiñ ïa ka jingkam ïa ki jaka lyngba ki kot ki sla bad jinglongtrai ïa ka jaka.
Haba kylli hato kane ka jingkam markylliang kan ktah pynban ïa ka jingïakren pynbeit pud ha ka wat ba-ar ha ki 6 tylli ki jaka ba ïakajia, u Bah Paul u la ong, ki jingkam markylliang ki mih namar bym pat lah ban pynbeit ïa u pud u sam, hynrei ynda la dep ban pynbeit ïa u pud, kan nym mih shuh kum kane.
Une u Myntri u la pynkynmaw ruh ba ïa ka jylla Meghalaya la thaw katkum ki kyndon aiñ jong ka Parliament, ha kaba ki pud jong ka Meghalaya ki dei ki bym pat pynskhem bad kiba shu long shipor katkum ka aiñ kaba don.
Kumta u la ong ba ka aiñ “State Reorganization Act, 1971” ka la ai jaka kum ka Jylla ban pynbeit ïa u pud u sam katkum ka jingïaid ka jingïakren.
Haba kylli lano ka jingïakren pynbeit pud ha ka wat ba-ar kan sdang biang, une u nongaiktien ka Sorkar MDA-II u la ong ba ka jingïakren la khmih lynti ba kan sdang biang hadien ka Dorbar Mang Tyngka jong ka Ïingdorbar Thawaiñ.
Nalorkata, u la ong ruh ba ka Kynhun Myntri kam pat ïakren halor ka jingthaw thymmai biang ïa ki Regional Committee kiba dei na ka bynta ki 6 tylli ki jaka kiba ïakajia kiba dang dei ban pynbeit ïa u pud u sam.
Kumta u Bah Paul, u la ïathuh ba ka Kynhun Myntri ka Sorkar Jylla ka la shu ïakren biang halor ki 6 tylli ki jaka kiba ïakajia pud kiba dang sah. Hynrei, kiei ki bynta kiba dei ban bud na ka bynta ka jingpynbeit ka shong ha ka Kynhun Myntri ban khmih bniah bad ban shim ïa ka rai.
