Delhi, Lber 17:
Ka Indian Railway ka la ïaid sted-sted shakhmat ban long ka ‘Net Zero Carbon Emitter’ ha shuwa u snem 2030.
Ha ka jingpyrshang ban pyndep ïa ka jingpynkylla bording ilektrik, ka Northeast Frontier Railway (NFR) ka la kot sa ïa uwei u mawmer da kaba sdang pyntreikam ïa ka Dudhnai – Mendipathar (22.823 Track Kilometre) na bynta bynta shi laiñ bad Abhayapuri – Pancharatna (34.59 Track Kilometre) na bynta bynta ar laiñ ha ka 15 tarik u Lber, 2023.
Ka Central Organization for Railway Electrification (CORE) ka la pyntreikam ïa ka jingpynkylla bording ilektrik ha kine ki bynta.
Dei tang ka Mendipathar ka jaka sangeh rel ha ka Jylla kaba la treikam naduh u snem 2014 hadien ba la plie paidbah ïa ka da u Myntri Rangbahduh ka ri.
Hadien ba la sdang pyntreikam ïa ka ‘traction’ bording ilektrik, ki rel ba tan da ki ‘locomotive’ bording ilektrik mynta kin lah ban treikam na Mendipathar ha Meghalaya bad kane kan pynsted shuh-shuh ïa kine ki rel.
Ha kajuh ka por, yn lah ban pynïaid shuh-shuh ïa ki rel kit mar bad ki rel kit briew ha kine ki bynta ha ka rukom kaba sted.
Ka jingpoi biang por jong ki rel ruh kan kiew ha kane ka bynta bad ki rel kit mar kiba tan da ki ‘locomotive’ bording ilektrik na kiwei-kiwei ki Jylla ki lah ban poi mynta sha Meghalaya.
Shuh shuh ka jingpynkylla bording ilektrik kan kyntiew ïa ka jinglah ïaid ki rel ha ka Thaiñ Shatei Lam Mihngi, ha ryngkat ka jingpynduna ka jingpynjakhlia ïa ka mariang namar ka jingkylla na ki umphniang sha ka bording ilektrik bad ka jingïaid ryntih jong ki kam rel ha kane ka thaiñ ruh kan kiew bha.
Kane kan plie lad ïa ka jingïaid beit ki rel bad tyngkai ïa ka por haba ïaid ki rel sha bad na ka Thaiñ Shatei Lam Mihngi ha ryngkat ka jingtyngkai ha ka ‘Foreign Exchange’ kaba kongsan.
