Kong Phai Nongrum
Ngi long kiba donbok ba ngi ioh ia ki District Councils, bad ngi long ruh ki nongshong shnong kiba kyrpang namar ngi ioh ia ka jingiada hapoh ka Sixth Schedule (under Artikle 244). Shuwa ban pyn kyrpang ialade bad sngew donbok ba ngi long kiba kyrpang ngi dei nyngkong ban kynmaw burom ia u Rangbah JJM Nichols Roy. Lane u Rangbah la tip da u Kpa jong ka Sixth Schedule. Ha ka por jong u Ka Ri Khasi jong ngi ka hap ha ka Assam bad u la iohi lypa ba ki buit pyniaid (tactics) jong ki heh Paid ka Ri thor ka long ban ioh lut ia ki jaka jong ka Ri Khasi. Ha ka por ba u pan ban pyntrei kam na ka Sorkar kmie ia kane ka Ain iada ba kyrpang la don ruh u maw jynthut ba la pyrshah da uta u Rohini Kumar Chaudhari u para dkhot na ki heh paid uba la thrang ban pynjah noh (assimilate) ia ki tribal Land sha ki Non tribal. La bynrap da u Kulahad Chaliha bad u B. Das ki la kyrshang ia u Chowdhari. Ki la bein ia u har rukom Hynrei u la jubab bad pynsngew ba ngi ki tribal ngi iapher bak-ly-bak na ki Non Tribal ha ka rukom pyrkhat, ka bam bad rukom im.
Ia u Rangbah JJM Nichols Roy la iarap da u Gopinath bordoloi bad ithuh da u Chairman jong ka Drafting Committee jong ka Ri India, U B. R. Ambedkar, la pdiang bad pynrung ha ka Sixth Schedule jong ka constitution jong ka Ri India ha ka 7th September 1949.
Kane ka jingkwah klun jong ki non tribal ka dang bteng bad ka nang heh haduh mynta. Ym tang ia ki jaka puta hynrei ka shong kha shongman, ki kam khaii, ki pule puthi ruh ki hap hapoh ka jingpeit bniah jong ka District council, ia kine baroh la sdang pyntroin tok pa tok, da ki buit ym da ka bor, hynrei ki jong ngi ki iohthiah lyngngai bad sdang khein daw thala ia ka kam jong ka District council.
Ia kine ki jingtlot jingswai jong ka Ri Khasi pnar la dep iada naduh u snem 1949. Kumta u la pynwandur bad saiñdur ha ka jingstad jong u ban tyngkhap ia ka Ri Lum Khasi ryngkat bad ki 3tylli ki States ha North East India ha kata ka Sixth Schedules haduh mynta. Ia kane u la trei bad thaw ki ain Ban iada ia ka hok long trai ka khyndew ka shyiap, ka riti synshar bad ka imlang sahlang kaba kyrpang. Khnang ba ki pateng ban wan kin ioh ban synshar hi ha la ri khlem da shahteh shah khum ha ki bor ban a Delhi, hynrei ban synshar laitluid (The right of self governance in accordance with the tradition) ngi lah ban shna ain ban pynbha ia ka imlang sahlang ha ka liang ban pyrkhing ia ka shong kha shong-man ban nym ai NOC ia ki pathar ia ka khaii pateng, hynrei ban kyntiew ia ka ioh ka kot kumba la pyniaid da ki Legislator kiba mynshuwa bad kum ba thrang da ki longshwa. Hynrei kane ka hok long briew man briew kan sa iaidlait noh na ngi lada ki Rangbah kiba la jied ban don ha kane ka iing dorbar ba kyntang ki khein sting bad ia tyllun tang sha ki kam ba pynmyntoi ialade.
Ia kata ngi iohi tyngkrein mynta ha kaba ki 11ngut ki MDC jong ka KHADC, (GVRMABPGTLF) kine ki alphabet hangne ki la lilam ki la soi khlem tarik da kaba ong “We support the Mou, da kane ka jingai jingkyrshan laplah bad khlem pyrkhat jngai, ki la leh ka pap ka sang ka la poi ka pud haduh ba U Himanta jong ka Assam u riewshemphang (Expert Encroacher) ba la tur pud bad pyndik ia ki State ha North East kiba marjan bad ka Assam, u la pynkordit da kaba la tam pud man la ka sngi. Da kane ka jingsoi matlah jong kine ki 11ngut ka la nang aibor shuh shuh ia une u Sierlapalang ban kyrniom suk ha ki thaiñ ba ia dei pud bad ka Assam, bad ka jingjynjar jong kiba shong ha khappud ka la poi haduh ba la siat bad khein nongtuh ba ki dei ki Miscreants, ha la shnong, ha la iing lajong, ha Mukroh, Mynta lei u la kam trai syndon. Ba la da kim kyndit bynriew noh bad leit pyndam ia ka MOU ka pyni ba kin dang ioh instalment ban ia khun MDC biang ha u snem 2024.
Ka daw baroh ka dei na ki MDC jong ka KHADC. Kumno kine ki 11ngut ki ai bor haduh katne ban wan prong u Sierlapalang haduh tyngkong. Ym tip shuh haduh katno tam ki Syiem bad ki Rangbah Shnong ki la shah thied shah khum ha kane ka kam khaii khyndew ha khappud. Kane ka jingleh kam kai ia ka khyndew ka shyiap ka pynishai ba kine kiba shong shuki MDC ki shu wan shet jakai bad wan shim ia ka District Council kum ka jaka jngi ban ia khun MLA, ki ioh ban bsuh Khlieh ha ka Seng NPP hynrei ha ka Jingiakhun MLA ki bun ki khlem shah jied ia ki nongshong shnong ban long MLA namar ki la die ia ka hima ka thaiñ bad ka raid ban ioh bsuh Khlieh bad ka seng ba khlain ba la kyrshan da ka BJP. La shah ia ka CAA da ka MP ban long ain ha Meghalaya. B ad bun kine ki dak ki shin ki Pyni ia ka jingtlot ha ka bor synshar khadar.
Hynrei kynmaw phi baroh ba lada ki dkhot jong ka District Council kim khein bad kim sngewthuh ba katei ka iing Dorbar ka long kum ka Madan thma, ka Jaitbynriew kan sa duh noh ia ka hok da kaba shah pyndam ia ka Sixth Schedule. Shuwa ban kwah rhah ban long ki Member sha kane ka Council, phi dei ban tip bad don jingtip kaba biang halade, ban skhem ka bor pyrkhat ka mon bad ka Mynsiem, ba lada phi jop ia ka jingieit jong u Paidbah, phin long u dkhot ha kane ka Council, phin ym dem kum u khah kat shaba beh ka lyer, namar ka nongrim phi la skhem ym don ba lah ban rat. Hynrei ki drama ha District Council kiba bun byllai, lada phim kyang phim pyrta sha ki nongjied jong phi ia kaba phi shem ha katei ka iing dorbar phin sa long kum u khlawait ba la shah set ha ka ruhnar.
Nalor ka riti ban iada ia ka khyndew ka shyiap ki don ruh katto katne ki kam iap kam im kiba donkam ia ki Legislator kiba smat ba sting ban pule ban thaw ain kum u Bah JJM Nichols Roy, ban pynbha shuh shuh ia kine harum :-
1.Ym dei ban ai lad ia ki kynthei ban long Rangbah shnong, kane ka long ka kam jong u Rangbah. Nga mynjur ba ka don ka jingdkoh trei kam ha ki katto katne tylli ki shnong kiba pynlong ia ki Kynthei ban mih madan bad dawa ia kane ka kam ba kin bat noh maki. Ka bor na District council ka dei ban wad kein ia ka daw balei ka leit jia haduh katne. Kaei pat ka mat trei kam kaba kham bha bad ka kyndon kaba biang ban weng ia ka jingeh ha kane ka shnong.
2.Donkam ban pynkylla noh ia ka jingbat kam Rangbah shnong na ka jingai sanad kaba shi jingim sha ka 5snem. Kaba mut ba ka kam Rangbah shnong ruh dei ban ai tang sa snam ia uno uno u Rangbah Shnong ne u Sordar khnang ba kan ym don ka kam leh donbor bad ka kam bamsap kaba ngi iohi tyngkrein bad don bun ki sakhi satar halor kane ka jingleh mon jong ki Nongialam shnong.
Ka kam Rangbah shnong kaba long ka kam trei mon sngewbha jong uno uno u Rangbah, kam dei ban long ka shuki ban wad ia ka jingeh ha liang ka kam ka jam (employment problem). Ki samla ba la biang ka kyrdan bad kiba smat ba sting kim dei ban ia tur sha kane ka kam da kaba mutdur ia ki khlur ha bneng. Lada bat slem da u juh u briew ia ka kam shnong ka ialam baraor sha ka jingjot jong kato ka shnong kaba shah, synshar. Namar ka malade bad ka hangamei ka rung kloi ha ka jingmut jingpyrkhat jong u Rangbah bad ki nongpynjot ruh ki bun ban myntoi shalade. Hynrei kato ka shnong ka troin ha ki liang baroh. Ki shnong ki don ka Village court ka village council, ka Vigillance Committee, ka Village Defence Party, bad kiwei pat ki Committee ba la pyniaid da ka dorbar shnong ban iaid beit iaid ryntih ka synshar shnong. Hynrei don ki shnong ba ia ka Village Court ruh pyniaid ujuh u Briew, ki Village Council ruh Phrung Khlieh u Juh, ha ka jaka ban ai lad ia kiwei, ban ia rai lang hynrei ki ialeh barabor ban tan sha lade. Namar ba la neh slem, lah leh main bad sngewkhain. Pynban kiba bun ki duh noh ia ka hok kaba ki dei ban ioh. Namar kata donkam ban pynthymmai noh ia kane ka kam da kaba buh nongialam shnong 5 snem tenure. Khnang ba kan ym don ka jingnoh shiliang ha ka synshar khadar.
Mynta katba nang shai ka tehnology ha kine ki snem la mih bun ki architect jong ka Ri kiba smat ba sting kiba shna ia ki project ki plan kiba heh ban shna ki long term scheme kiba ban pyntrei ha ki shnong kyndong bad shnong sor, ban ai kam ia kiba bun ba lang, bad ka jingpyntrei kaba da ki crore tyngka. Khnang ba ki scheme kin poi sha ka 75 haduh 85 % ban jop ha ka jingpyntreikam, donkam ka jingkhuid bad ka jingkheiñ tiak-pa-tiak na ki nongpyniaid shnong. Namar ki employment generation scheme ki don ka flag ship lane ka time bound programme, ban bishar bniah pat ba hadien ba pyntrei kam ia kine ki scheme ….. kan mih aiu hadien 5 ne shi phew snem. Bad kato ka shnong ba donbok ban don ki nongialam kiba stad ban pyntrei kam hok ia ki scheme ka lah da kaba suk ban sam ia ki capacity building sha ki nongkyndong ba kin im ha la shnong da ka jingsarong.
Hynrei lada ka don ka jingpyndonkam bakla da ki nongpyniaid shnong, kane ka saiñdur (plan) jong ka Sorkar ba la dep thaw (frame) ban kyntiew (uplift) ia kato ka shnong, kam ai jingmih (result) kaba bha. Mih ki jingiaujor, ki jingbynniaw,. Ki jing-iashoh bad jingiaknieh ha shnong ha thaw. Kaba poi sha u pud ba kim lah shuh ban ia map.
Ki don ki skul sha ki nongkyndong kiba la tei la shna da ki District council, ia kine ruh dei ban kyntiew noh ia ka kyrdan pule kat kkum ka jingdawa ba mynta da kaba pynbha ia ki school bad kyntiew shaduh ki kyrdan college bad kita ki Community College, khnang ba ki khun samla ba la pass kin ioh ban bteng ia ka jingpule ha la skul ha la shnong.
Donkam ruh ba ki bor jong ka District Council lyng-ba ka jingia mir jingmut bad ka Sorkar katkum ka DCA Department, ban shna surok bad canal ha ki sawdong pud jong ka Meghalaya bad Assam, ban ithuh shynna ia u pud u sam. Kumba ngi iohi ha jagi road, Nalor ba ka Assam ka la dep shna ka surok Jagi road ba border bad ka Meghalaya, Ka Assam ka dang tur ban knieh pud haduh jingkieng jong ka Wah Umsiang marjana bad ka MPRO Office, kane ka jingleh bym salia na ka liang ka Assam ka pyni ba ki bor ba dei peit kim khein snep ia ka shi phut ar phut bad ki sa kylla Meter bad Kilometer suki suki bad ka buit tuh jong ki Makhar na ri thor. Haba leit dakhol jaka ki la hun ban shu shong ha mieh bad dih lassi dish sha masala….. ai ba un ia khyrwait katba mon ia kato ka khyndew bym don dor ei ei. Pynban tang ioh claim kin wan shong kum ki kruin ban nang kiew artet. Bad ka jingiaid jong ki por. Ine dei tang i nuksa barit, bad kiba sngewthuh ki la sngewthuh hi. Ki bym salia te ki matlah matpei, tangba biang ka bank balance, “Kam mat ia dep shato. Uei hi u ban leit shong shato sha khlaw border, pynban ha ki khar thor ki dei ka ksiar ka rupa, kaba mangi ngin sa lah ban pynshong dor ynda ngim long trai shuh ia ki.
