Shillong, Lber 17:
Ka Hynñiewtrep Integrated Territorial Organisation (HITO) Umden Area ha ka Sngi Thohdieng ka la leit ban hiar bad khynra ïa ki kot ki sla kum ka Labour laisen ha ka shnong Umden-Umroi kaba don ha Umroi, Ri-Bhoi District.
Ka seng hapoh ka jingïalam u President, samla Lostar Lyngdoh, samla Youbarles Jana ha ryngkat ka jingsynranlang u Organizing Secretary ka Ri-Bhoi District, Bah Silverios Masharing ki la lap ba kitei ki bar Jylla kiba la trei la ktah hapoh ka shnong ki dei ki bym biang ki kot ki sla bad na ka liang ka seng hadien ba ka la ïohi ïa kane mar-mar ka la pynher krad noh ïa kitei ki bar Jylla.
Ka seng ka la kyntu ïa ki nongïalam shnong ba kin ïatreilang bad ka seng khnang ba ka shongsuk shongshngaiñ kan don hapoh ka shnong ka thaw baroh kawei. Nangta ka seng ka la kyntu ruh ïa ka shnong ba kam dei ban wanrah ïa ki nongtrei bar Jylla khlem ki kot ki sla kiba biang.
Na ka liang u President, u la ong ba hadien ka jingkhynra la lap ba kitei ki bar Jylla kiba wan ban trei ban ktah ha katei ka shnong ki dei ki bym biang ki kot ki sla ba donkam.
“Na ka liang jong ka seng, ngi kyntu ïa ki bor shnong ba nangne shakhmat, ai ba ngin ïatreilang bad ngi ka seng bad na ka liang ka seng ka don tang ïa kawei ka lynti bad kata ka dei ba ngin ym ailad satia ba da lei-lei ruh ba ki briew ba khlem kot khlem sla kin wan ban trei hapoh ka shnong ka thaw jong ngi,” la ong u President.
