Shillong, Lber 17:
Wat la ki nongïalam ka Hynñiewtrep National Liberation Council (HNLC) ki la leit phai biang sha Bangladesh mynta la jan dap hynñiew bnai hadien wan sha Meghalaya na bynta ban ïakren ïasuk bad ka sorkar kam shym la don dak shuh.
Haba ïakren bad u ksiang jong ka HNLC u Bah Sadon Blah, u la ïathuh ba naduh ba ki nongïalam ka seng HNLC ki la leit phai biang sha Bangladesh ha ka 16 tarik Nailur, 2022 kaba la jan dap mynta hynñiew bnai kam shym la don shuh kano-kano ka jingïakren hapdeng ka HNLC bad ka Sorkar Jylla ne Sorkar Pdeng.
U la ïathuh ba naduh ba ki nongïalam ka HNLC ha Bangladesh ki la ïatai ïa ka jingïakren ïa ki mat bad ka Sorkar Jylla bad Sorkar India, ki don katto katne ki kyndon kiba jyrwit-jyrwat bha kaba la pynsahteng ïa ka HNLC ba kan shim ïa kano-kano ka rai.
“Hadien ba ki nongïalam ki la leit phai sha Bangladesh, ka la shim por ïa ki ban ïa pyrkhat ïa ki jingïakren kaba ki san ngut ki nongïalam ki la dep wan kiew sha Shillong bad ka la nang sahteng ka dei ka jingwan noh sa ka ilekshon MLA kaba la long ha u bnai Rymphang mynta u snem” u la ong.
Kumta u Bah Sadon u don jingkyrmen ba ka jingïakren ïasuk hapdeng ka HNLC bad ka Sorkar Jylla bad Sorkar India kan poi sha ka thong hadien ba u Myntri Rangbah ka Jylla, u Conrad K Sangma ryngkat bad ki Kynhun Myntri ki la wanphai biang ban thaw ïa ka sorkar kaba thymmai.
U la ong haba ki juh ki seng saiñ pyrthei kiba wan biang ban thaw ïa ka sorkar kaba thymmai, u don jingkyrmen ba kin buddien ïa kane ka jingïakren.
Shuh shuh u Bah Sadon u la ong ba ïa ki kyndon kiba ka seng ka la buh hakhmat ka Sorkar Jylla um kwah ban pynpaw pyrthei, hynrei kin sa mih ynda la biang ka jingïakren ïasuk.
Kum ban shu pynkynmaw ki nongïalam ka HNLC kiba la wan ïakren ïasuk bad ka Sorkar Jylla ki long u Bah Manbhalang Jyrwa, u Arister Thongni, u Phrangkupar Diengdoh lem bad ar ngut ki nongbud; kita u Bah Aibor Marbanaing bad Bah S. Lyngdoh.
