Shillong, Lber 17:
Ka Kynhun Myntri ka Sorkar Jylla ka la mynjur ban pynkiew noh ïa ka tulop ki nonghikai kiba hikai ha ki skul Pre-Primary kiba don kumba 710 tylli ha kane ka Jylla, da kaba pynkiew na ka T.12,000 shi bnai sha ka T.18,000 shi bnai.
Ïa kane la ai jingmynjur da ka Kynhun Myntri jong ka Sorkar MDA-II ha ka jingïalang kaba la pynïaid da u Myntri Rangbah u Conrad K Sangma ha ka sngi Thohdieng.
Haba ïathuh ïa kane ka rai, u Myntri Sorkar uba dei ruh u nongaiktien ka Sorkar MDA-II, u Bah Paul Lyngdoh, u la ong ba kane ka jingkyntiew ïa ka tulop ka dei lyngba ka jingpynkiew ïa ka ‘Grant-in-aid’ ha kaba la pynkiew ïa ka tulop na ka T.12,000 shi bnai sha ka T.18,000 shi bnai na ka bynta baroh ki nonghikai kiba hikai ha ki skul Pre-Primary School kiba don ha kane ka Jylla.
Haba kylli halor ka jinglut jingsep kaba ka Sorkar ka hap ban bei namar ka jingpynkiew tulop, u Bah Paul u la ong ba ka jingmang pisa tang na ka bynta kane kan kot sha ka T.5.11 klur shi snem.
