Shillong, Lber 17:
Ka National Cricket Academy (NCA) jong ka BCCI ka la jied ïa hynriew ngut ki ’thei ïalehkai na ka Meghalaya Cricket Association ki ban ïashim bynta ha ka prokram ai jinghikai Senior Women North East ka ban long ha Dimapur naduh u bnai ban wan.
Hynnin ka sngi ka MCA ka la pynbna ba ki la don saw ngut ki rangïalehkai ka Jylla kiba la shah jied ban ïashim bynta na ka bynta ka Zonal Cricket Academy ka ban long ha Guwahati naduh u Ïaïong.
Ka jingshah jied kitei ki ‘thei ïalehkai ka la wan hadien ka jinglah ban ïalehkai bha ha ki lympung ïalehkai na ka bynta ka Jylla. Kine ki kynthup ïa ka Daiaka Emigale Warjri, Debasmita Dutta, Ajima Sangma, Monica Lyngdoh Phawa, Neha Hajong bad ka Suriti Kumari Ray.
Kane ka prokram jinghikai kan sdang naduh 24 tarik u Ïaïong haduh 18 tarik u Jymmang.
Ha kane ka prokram jinghikai kin don haduh 25 ngut ki ’thei ïalehkai na ka thaiñ shatei lammihngi ki ban shah jied ha ka All-India Senior Women Selection Committee jong ka BCCI na ka byna katei ka prokram.
Katei ka jingjied ïa kitei ki nongïalehkai ka long kat kum ka jinglah ka jong ki ban pynpaw ïa ka sap ha ka Senior Women’s T20 Trophy kaba la long ha Risaw 2022 ha Bangalore bad ka Senior Women’s One Day Trophy kaba la long ha Kyllalyngkot mynta u bnai ha Nagpur.
