Kigali, Lber:
Ha ka sngi ba dang iaid ka jing-ialang kaba heh ka 73rd Congress jong ka synjuk pyniaid jingialehkai phutbol ba ha khlieh duh ka pyrthei ka Federation International of Football Association (FIFA), ka khubor ba la ioh lum ka iathuh ba na katei ka jingialang kaba long ruh ka sngi jied nongialam ba thymmai jong ka synjuk, u Gianni Infantino u lah shah jied biang sa shisien kum u khlieh duh jong katei ka synjuk.
Ha katei ka jingiakhun, u Infantino u la ieng skhem ha katei kajuh ka kyrdan kaba u lah bat baroh shi katta khlem kano kano ka jingshah pyrshah, da kaba pynlong ialade ban shah jied biang kum u nongpyniaid sa shisien ia ka synjuk kaba iaid beit iaid ryntih, watla um shym la long than uba pawnam ha kylleng ki ri ka pyrthei napdeng ki dkhot jong ka Associations na ka bynta ki katto katne ki daw, kaba kynthup ruh ia ka jingialeh ka jong u ban niat beit shakhmat ia ka jingbym shym la lah ban pynurlong ia ka jingthmu na ka bynta ban pynlong ia ka lympung ialehkai World Cup man la ka ar snem ha ka jaka ba ju pynlong shisien ha ka saw snem. Hadien katei ka jingshah jied biang ka jong u, na ka liang jong u infantino u lah kular skhem ruh ba un iai bteng ha ka ban ai ka jingshakri kaba bha shuh shuh sha ka synjuk baroh kawei bad ruh ia ka kam ialehkai phutbol ha kylleng ka pyrthei. Utei u nongialam u lah pynthikna ruh ia ka ioh-ka-kot jong ka FIFA kaba lah kynjoh sha ki kyrdan thaw rekod ha ka shalyntem ba lah dep kata naduh u snem 2019-22. Hynrei uba lah kular ban iai pynneh-pynsah ia ka jingkiew katei ka bynta ha kane ka kynti kaba mynta sa shisien biang pat da ka jingioh jingkyrshan jong ka synjuk na ka bynta ban nang iai pyniar shuh shuh ia ki jingialehkai ha ka lympung ialehkai World Cup jong ki shynrang bad kynthei bad ruh ka jingwanrah shakhmat ia ka jingpynithuh sha ka pyrthei ia ka jingpynbun kynhun ialehkai ha ka Club World Cup sha ka 32.
Shuh shuh u lah pynpaw ruh ba ka ioh-ka-kot ka lah kiew bha sha ka $7.5 billion ha ka samoi jong u 2022 uba long ruh u snem ba ka pyrthei baroh kawei ka dang shah lynshop ha ka jingpang khlam COVID-19. Kumta ka tyllong pla tyngkat jong ka synjuk ka iengskhem sha kumba $1bn bad mynta ka sien ka lah kot sha ka $4bn. U lah pynpaw ruh ba ka FIFA kan iai bteng ha ka ban bishar bad khmih bniah biang sa shisien ia ka rukom pyniaid ha kaba iadei bad ka jing-iadie-iathied rangialehkai (transfer system) na ka bynta ban pynjanai shuh shuh ia ka jinglong khuid long suba bad ka jing-iaid beit iaid ryntih ha ka kam bad uba lah ai jingmut ruh ba ki synjuk bapher bapher ki lah ruh ban iakren bad mir jingmut ha kaba iadei bad ka jingsiew sha ki nongialehkai.
Kumba ka paw mynta ka long ba u Infantino u lah shah jied nyngkongeh kum u nongpyniaid ba ha khliehduh ka FIFA ha ka Extraordinary Congress kaba lah long ha u snem 2016; kata hadien ka jingsoi ia ka shithi iehnohkam jong u nongpyniaid barim jong ka u Sepp Blatter bad ha kaba u Infantino u la lah ha ka ban pynneh ia katei ka kyrdan halade khlem kano kano ka jingpyshah ka ban mih lai snem hadien. Bad kane ka kynti ba mynta lah niew kum ka sien kaba ar ba un pyntyllun ia ki kam ha ka shlem treikam ka jong u bad u ban sa iai don ruh na ka bynta ka samoi treikam kaba lai bad ba khatduh ha ki por ba saw snem.
