New Delhi, Lber:
U Myntri khynnah jong ka tnat ki kam pohïing u Nityanand Rai u la ong ba ki la don kumba saw tylli ki seng ïa kiba la shah ithuh ba ki dei ki kynhun lehnoh ki la shah pynngat hapoh ka UAPA ha une u snem bad ïa ki kyrteng jong ki la buh ha ka First Schedule jong ka aiñ.
Ka tnat ki kam pohïing ha ka sngi Balang ka la pyntip ha Rajya Sabha ba haduh mynta ka la dep ban ñiewbeaiñ ïa ki 54 ngut ki lehnoh bad ïa 44 tylli ki kynnun lehnoh hapoh ka Fourth Schedule bad ka First Schedule jong ka UAPA. “Kine ki saw tylli ki seng ki kynthup ïa ka The Resistance Front (TRF), Peoples Anti-Fascist Front (PAFF), Jammu and Kashmir Ghaznavi Force (JKGF) bad Khalistan Tiger Force (KTF) kine ki seng ki la don bynta ha ka ban leh ïa ki kam pyntriem bad ki la don bynta ban thombor bad ban ïashim bynta ha kiba bun ki kam pyntriem jong ki lehnoh pyrshah ïa ka ri,” u la ong.
Kum ka jingbatai bniah halor kine ki saw tylli ki seng, u Rai u la ong ba ka seng TRF ka long ka kynhun kaba la mih ha ka jaka jong ka kynhun lehnoh Lashkar-e-Taiba bad kane ka la paw pyrthei ha u snem 2019. “Kane ka seng ka la don bynta ha ka ban thmu pynïap ïa ki shipai ïada ri bad kumjuh ki riewpaidbah kiba lui lui ha Jammu & Kashmir, ka la don bynta ruh ha ka ban ïatreilang bad ban shalan ïa kiba bun ki tiar siat sha ki kynhun lehnoh, ban pynrung dkhot ïa ki briew ha ki kynhun lehnoh, ban pynrung tuh ïa ki lehnoh bar ri bad ban khaïi tuh ïa ki tiar siat bad ki drok ha kylleng ki bynta khappud,” u la ong.
Ha kaba ïadei bad ka PAFF, u la ong ba kane ka kynhun kaba la mihkhmat na ka bynta ka kynhun Jaish-e-Mohammed bad ka la paw pyrthei ha u snem 2019. “Kane ka kynhun ka la don bynta ha ka ban pynbiej ïa ki samla…, ban phah ïa ki khubor byrngem sha ki shipai ïada ri, ki nongïalam jong ki seng saiñ pyrthei bad sha ki nongtrei sorkar ha J&K na kiba bun kiwei pat ki bynta jong ka ri, ka la don bynta ruh ban thmu pyntreikam da ka met ne lyngba ki lad phah khubor ha ka ban leh ïa ki kam pyntriem ha J&K bad ha ki nongbah ba paw jong ka ri,” u la bynrap. Ka seng kaba lai kaba la shah ñiew beaiñ ka dei ka JKGF, kane ka seng ka la paw pyrthei ha u snem 2020 bad ka la shim ïa ki dkhot ban treikam hapoh ka seng na ki kynhun lehnoh Lashker-e-Taiba, Jaish-e-Mohammed, Tehreek-ul-Mujahideen, Harkat-ul-Jehad-e-Islami, u la ong.
“Kane ka seng ka la don bynta ha ka ban pynrung tuh ïa ki lehnoh bar ri, ban khaïi tuh ïa u drok bad ki tiar siat bad ban leh ïa ki kam thombor ha ka Union Territory jong ka Jammu & Kashmir,” la ong u Rai ha ka jingphah jubab halor ka jingkylli ba la buh da u MP jong ka seng BJP u Sushil Kumar Modi. Ka seng KTF ka la paw pyrthei ha u snem 2011 ha kaba ka la long ka nongmih khmat jong ka kynhun Babbar Khalsa International, ka kynhun lehnoh kaba la shah pynngat hapoh ka UAPA. “Kane ka seng ka la don bynta ban leh ïa ki kam pyntriem jong ki lehnoh bad ki dkhot jong ka ki ju ïoh jingïarap pisa bad ïoh jingkyrshan shibun…na ki kynhun bad ki nongïalam ka kynhun kiba nabar ri bad kane ka kynhun ka la don bynta ha ka ban leh ïa ki kam thombor ba bun bad kumjuh ruh ban pynïap briew,” u la ong.
