Shi taïew ai por ka HNYF ïa ka KHADC ban khang ïa 18 tylli ki khyrdop lum khajna

Shillong, Lber 17:

Ka HNYF, East Khasi Hills ha ka Sngi Thohdieng ka la ai por shi taïew ïa ka KHADC ban khang khyrdep ïa 18 tylli ki khyrdop lum khajna ba la kynnoh treikam be-aiñ.

U President ka HNYF East Khasi Hills, Bah Bles Dkhar ha ka jingïakynduh bad ki lad pathai khubor u la ong ba ka KHADC ka pyntreikam be-aiñ ïa kitei ki khyrdop khlem da ïoh ïa ka NOC na ka National Highway Authority of India (NHAI) bad na ka Sorkar Jylla.

U la ong ruh ba ka KHADC ka la ïai bteng ban pyntreikam ïa kitei ki khyrdop wat la ki dang don 2 tylli ki mukotduma ba sahteng ha ïingbishar ka jylla haba ïadei bad ka jinglum khajna.

“Ngin sa ujor sha u Chief Secretary bad Deputy Commissioner ban phah khang ïa kine ki 18 tylli ki khyrdop lada ka KHADC kam lah ban khang ïa ki hapoh shi taïew. Ngin sa leit hi ruh da lade ban khang ïa kine ki khyrdop lada ki bor ba dei khmih kim leh eiei,” la ong u Bah Dkhar.

Ha kajuh ka por, u la buh jingkylli ruh ïa ka KHADC halor ka jingbym pynbna ne khot ‘tender’ ban pynïaid ïa kitei ki khyrdop.

“Ïa ki kontrak ban pynïaid ïa kine ki khyrdop la ai sha kiba don jingïadei bad u CEM, Executive Member (EM) ne MDC. Ngi ïohi ba ki briew kiba pynïaid ïa kine ki khyrdop ki riewspah bad ki don ki jaka-puta kiba heh tang ha ki khyndiat por,” u la ong.

Utei u nongïalam u la pynpaw ka jingsngewsih ba ki briew kiba don ha ka bor ha KHADC ki ïadon bynta ha kiba bun jait ki kam be-aiñ.

“Ngi tip halor ka jingthung kam sop-sop ha KHADC. Ym don mano-mano ba tip shaphang ki kam ba lait na bym ju pynbna ïa ki,” u la ong.