Amlarem, Lber 17:
Ka Sports Meet kaba 14 ba la pynlong da ka Pasadwar Cluster ha ki ar sngi lynter ka la poi noh sha kaba kut ha ka 16 tarik mynta u bnai ha ka shnong Kamsing.
Ki khynnah skul bad ki nonghikai kiba hap hapoh ka Cluster Pasadwar ki la leit sha ka shnong Kamsing da ki lieng namar katei ka shnong kam don lynti da kumwei lait noh tang da ki lieng ban poi sha katei ka shnong kaba don ha khappud bad ka Bangladesh.
Ki skul kiba hap hapoh ka Cluster Pasadwar ki don 9 tylli kiba kynthup 6 tylli na ka kyrdan Lower Primary School bad 3 tylli na Upper Primary School. Katba ki saw tylli ki shnong kiba hap hapoh ka Cluster Pasadwar ki long ka Pasadwar, Lumpyngngad, Kharkhana bad ka Kamsing.
Ha kine ki ar sngi ki khynnah ki la ïoh ka lad ban ïakhun ha ki jingïalehkai bapher bapher.
Ïa ka nam ‘Best Match Pass’ ha ka kyrdan UP School la ïoh rah da ka skul Kharkhana UPS. Ha ka kyrdan LP School la ïoh rah da ka Pasadwar Govt LP School bad ka nam ‘Best discipline’ la rah da ka Kamsing LP School.
Ka lahduh ha ka jingïalehkai football ha ka liang ki shynrang la ïoh rah da ka Kharkhana UP School bad na ki kynthei la ïoh rah da ka Pasadwar UP School.
Ha ka kyrdan Lower Primary School na ka liang ki shynrang la ïoh rah da ka Kamsing LP School bad na ka liang ki kynthei la rah da ka Kharkhana Govt LP School.
La sam ruh ïa ka khusnam Best Athletes sha ki saw ngut ki khynnah kiba paw bha ha ki jingïalehkai. Ha ka kyrdan UP School la sam sha u Sumon Tudu na Kharkhana UP School bad ka Daiomika Shylla na Pasadwar UP School kumjuh sha u Federation Swer bad ka Kobita Tati kiba na ka skul Kamsing LPS.
Ïa kane ka Sports Meet la plie da u General Secretary ka shnong Kamsing u Bah Augustine Pamblang ha ka jingdonlang ki rangbah shnong, ki nongkit kam shnong bad ki khynnah skul.
