Chandigarh, Lber:
U DGP Gaurav Yadav, u la ïathuh ba hapoh ka jingpyntreikam kaba kyrpang na ka bynta ban leit kem ïa kito ki dkhot kiba donkti ha ki kam beaiñ bad kumjuh kiba dang phet rieh ïa kiba la shah pynngat hapoh ka NDPS, ki pulit jong ka Punjab ki la ïoh ban kem ïa ki 828 ngut ki briew kiba la shah mudui bad kiba la phet rieh na ki kti jong ka aiñ naduh ka 16 tarik, Lber, 2022.
“Naduh ka 16 tarik, ,Lber, 2022 haduh ka 15 tarik, Lber jong une u snem, ki pulit jong ka Punjab ki la ïohlad ban pyntroiñ ïa kumba 26 tylli ki kynhun lehnoh da kaba ïoh ban kem ïa ki 168 ngut ki lehnoh bad ki nongïarap jong ki ha kaba la ïoh ban kurup ïa ki 31 tylli ki suloi, 201 tylli ki pistol, 9 tylli ki bom Improvised Explosive Device (IEDs) ba ju pynbthei ha ki Tiffin, 8.72 kilo u bom RDX bad kiwei pat ki tiar pynbthei, 11 tylli ki bom kawang kti, ar tylli ki jingsiat ‘namding, 30 tylli ki Drone bad uwei u Rocket Propelled Grenade (RPG), la ong u Director General of Police jong ka Punjab u Gaurav Yadav, ha ka por ba u la wanrah ïa ki jingpyntip ba bniah halor ki jingpyntreikam jong ki pulit ka jylla hadien ba la thaw sorkar ka seng Aam Aadmi Party (AAP) ha Punjab. U DGP u la ong ba ki jinglong jingman ha kane ka jylla la sakhi ba ki la kham ïaid beit ïaid ryngtih haba khmih halor ka jingjylli jong ki kam sniew bad ka jingdon jong ki runar ha kaba la lah ban pynngat ïa ki ha ki kti jong ka aiñ, kaba kiba bun kiwei pat ki la ïaleh ban phet rieh na ka jylla da ka jingdon jong ka jingpyntreikam pyrkhing jong ki pulit ka jylla ban ïakhun pyrshah halor ki jingeh kiba wan hapoh ka imlang ka sahlang.”
U la ong, “ka Anti-Gangster Task Force (AGTF), naduh ba la thaw ïa ka ha ka 6 tarik, Ïaïong, 2022, ka la ïoh ïa ka jingjop ha kaba ka la lah ban pyntroiñ ïa kumba 162 tylli ki kynhun runar hadien ka jingshahkem jong ki 582 ngut ki runar bad ïoh ban siat ïap ruh ïa ki san ngut kiwei pat, la ïoh ruh ban kurup ïa 586 tylli ki tiar siat bad 131 tylli ki kali ïa kiba la pyndonkam ha ka ban leh ïa ki kam runar.”
Kum shi bynta ban pynurlong ïa ka jingthmu ha ka ban lah ban rat dyngkhong ïa ka jingjyllei u drok ha ka jylla, u DGP u la ong, “ki pulit jong ka Punjab ki la trei shitom na ka bynta ban lah ban ïakhun pyrshah ïa u drok ha ka jylla ha kaba kane ka jingtreikam jong ki ka la pynlong ban ïohkem ïa kumba 17568 ngut ki nongkhaïi drok hadien ba la buh ïa ki 13094 tylli ki jingujor ejahar naduh ka 16 tarik, Lber, 2022 pyrshah ïa ki. Ki pulit ki la ïoh ban kurup kumba 863.9 kilo u Heroin tang ha ka shi snem.”
U la bynrap shuh shuh da kaba ong, ba kumba la antad, ki pulit ka Punjab ki la ïoh ban kurup kumba 716.9 kilo u Heroin na ki bynta ba bun jong ka jylla bad sa 147.5 kilo u Heroin la ïoh ban kurup da ka kynhun jong ki pulit na ki jaka sangeh jhad jong ka Gujarat bad Maharashtra, ha kaba baroh u drok ba la ïoh ban kurup u la long da 863.9 kilo.”
