Shillong, Lber 17:
U Habanjop Richmond Marbaniang, u khynnah ba dang 15 snem ka rta bad uba pule ha ka skul Rama Krishna Mission, Sohra, u la lah ban pynpaw ïa la ka jong ka sap ha ka ‘Talent Identification Program’.
Ha ka wat ba-ar jong ka jingïit sap ïalehkai lane ba kyrpang, u Habanjop u la lah ban pynpaw ïa ka jingtbit da kaba lah ban mareh ha ka jingjngai kaba 20 metre ha ki 2.91 sekhon bad u la lah ban pynpra ïa ka reked jong ka ‘international global benchmark’ kaba long 3 sekhon.
Ïa ka Bynta-2 jong ka Talent Identification Program kaba la sdang ha ka sngi Thohdieng ha Sohra kaba long hapoh katei ka skul, la pynlong da ka Meghalaya State Olympic Association (MSOA) bad ka tnat ïalehkai jong ka Sorkar Jylla.
Ïa kane ka jingwad ïa ki khynnah ba don sap la wan jied kyrpang da ka Edge-10 kaba dei ka kynhun na Australia hapoh ka jingïalam u rangïalehkai Olympic barim u Ian Campbell.
Ha kane ka prokram la wan ïashim bynta da 300 ngut ki khynnah kiba 10-18 snem ka rta.
Kane ka kynhun kan sa leit ruh sha ki CR&D Block na ka bynta ban bishar bniah ïa kumba shiphew hajar ngut ki khynnah.
Lah ban kdew ba dangshen ki la don kumba 4500 ngut ki khynnah kiba la shah bishar bniah bad napdeng kitei, la jied sa tang 200 ngut ki khynnah kiba kynsai ki ban ïoh rung sha ka prokram ai jinghikai kaba shi snem kynthih ïa kaba la tip kum ka Elite Pathway program (EPP).
