New Delhi, Lber:
Wat lada ka la kham duna ha ki san snem ba la leit, ka India ka dang ïai bat kum ka ri kaba hakhlieh duh ha kaba ïadei bad ka jinglah ban pynïoh ïa ki tiar siat bad pynbthei na ki ri ka pyrthei. Ha kaba ïadei bad kane, katkum ka jingïathuh bniah jong ka Stockholm International Peace Research Institute (SIPRI), la ong ba ki ri Europe ki la lah ban pynïoh ha ka liang ki tiar siat bad pynbthei ha kine ki snem ba dang shen. Kumba la ïathuh bniah la ong ba ka India bad ka Saudi Arabia ki la long ki ri kiba hakhlieh eh ki ban lah ban wanrah ïa ki tiar siat bad pynbthei na shabar ri.
Ka United States bad ki saw tylli kiwei pat ki ri ki la paw ba ki la lah lai shah ban shalan ïa ki tiar siat sha kiwei pat ki ri. Ka jingwanrah ïa ki tiar siat kiba kham donkam da ki ri Europe ka la kiew da 47 per cent hapdeng u snem 2013-17 bad u 2018-22, katba ka jingshalan ïa ki tiar siat bad pynbthei ha baroh ki ri ka pyrthei lada shim jingkheiñ baroh lang ka la hiar da 5.1 per cent ha kum kane ka por.
Ki la don kumba 29 tylli ki ri kiba la shalan ïa ki tiar siat bad pynbthei sha Ukraine ha u snem 2022. Ka US ka la paw ba ka la long ka ri kaba la phah shibun ki tiar siat sha Ukraine, kaba la long da 35 per cent ka jinglah ban wanrah ïa ki tiar siat nabar ri. Katkum ka jingïathuh bniah jong ka SIPRI, haba phai sha India la ong ba ka la jur bha ka jingdawa ïa ki tiar siat bad pynbthei namar ka jingbym ïasngewthuh jingmut bad ka Pakistan bad ka China.
“Ki jinglong jingman halor ka jingbym ïasngewthuh jingmut bad ka Pakistan bad China ka la pynlong ban dawa ïa kiba bun ki tiar siat na shabar ri. Da ka jingdon ïa 11 per cent ka jinglah ban wanrah ïa ki tiar siat bad pynbthei na shabar ri, ka India ka la paw ba ka la long kawei na ki ri ka pyrthei kaba la pynjur bha ka jingdawa ïa ki tiar siat ha u snem 2018-22, ha kaba kane ka la bat ïa kane ka kyrdan naduh u snem 1993-2022”, la ïathuh ka tyllong khubor. Ka Russia ka la long ka ri kaba la shalan shibun eh ki tiar siat bad pynbthei sha India, hynrei kane ka kam ka la hiar da 19 percentage naduh u snem 2013-17 haduh u 2018-22.
