Jowai, Lber 19:
Ko ri Khasi Jaiñtia, pha donkam ï’u Blei ha kine ki sngi, namar ki khun jong pha ki la phet sha jngai na ka mon U Blei, jingim ki briew la nang jyllei ha ka pop ba thala, phai ko lok baieid, to phai shu Blei.
Ïa kane ka dkhot jingrwai la rwai da ki samla ka Balang Lumshnong ha ka jingïaseng Synod kaba Arphew-wei kaba la long ha ka Balang Presbyterian Nangbah, Nangbah District kaba hap ha ka Nangbah Nongjngi, Hadem Presbytery ha ka Sngi U Blei.
Kane ka jingïaseng ka la sdang ha ka 17 tarik u Lber bad ka la poi sha kaba kut ha ka Sngi U Blei halor ka sobjek Synod, “To puh ïa ka khyndew shrah jong phi,” Hosia 10:12.
Ïa ka jingïaseng la pynlong ha Ïingmane jong ka Balang Nangbah namar ka jingjur palat u slap naduh ka Sngi Saitjaiñ bad pynkhyllem ruh ïa ka dara kaba la pynkhreh na bynta kane ka jingïaseng.
Wat hapdeng ka jingpynwit jong ka mei mariang, hynrei ki ’riewngeit jong ka Balang Presbyterian ki la wan tuid sha ka jingïaseng Synod bad pyndap smam ïa ka ïingmane bad don ruh ki ’riewngeit kiba ïeng ha phyllaw ïingmane kiba kup ryngkat ki shatri ban sngap ïa ka khubor na ka ktien jong U Blei.
Ha ka jingïaseng kaba la long ha ka por 10.30 baje mynstep ïa ka khubor na ka ktien U Blei la sam da u Rev. H.S. Dann uba la shim na ka kitab Isaiah 59:8.
Katba ha ka por shiteng sngi ïa ka khubor na ka ktien U Blei la sam da u Rev. G.P.L. Gadew bad ïa baroh ar ki jingïaseng paidbah la pynïaid da u Moderator Elect, u Rev. C.S. Laloo.
La pynrhem shuh shuh ïa ka jingïaseng da ka jingïoh ïa ki jingrwai ‘Choir’ na ka Jingïaseng Samla Balang Lumshnong, Jingïaseng Samla Balang Sutnga, Jingïaseng Samla Moodymmai Wah bad Jingïaseng Samla Balang Thadlaboh, Jowai, Jingïaseng Samla Balang Malki, Jingïaseng Samla Balang Shangpung, Jingïaseng Samla Balang Nangbah bad Standing Choir Jingïaseng Samla KJP Synod Mihngi.
Ha ka jingïaseng ha ka por 6.30 baje janmiet, ïa ka sobjek Balang, “Ka Balang ka Angkor U Blei ba neh den bad ba skhem”, Hebru 6:19 la kren da u Rev. (Dr.) M.J. Hynñiewta bad la ïoh ka jingrwai ‘Choir’ na ka jingïaseng samla Balang Dkhiah bad Jingïaseng Samla Balang Ratacherra.
Ka jingïaseng Synod kaba Arphew-ar kan long ha ka Balang Pomlakrai, East Khasi Hills District.
