Shillong, Lber 19:
U Bah Ardent M Basaïawmoit uba dei u President ka Voice of the Peoples Party (VPP), u la ïathuh ba ki don ki konstitwensi kiba poi haduh 20 ngut ki kyrtong kiba wan pan tiket ban ïakhun ïa ka ilekshon MDC ha u snem 2024 ha ilekshon Khasi Hills Autonomous District Council (KHADC).
Kane ka jingphla u Bah Ardent ka dei haba u ai jingkren haba ka VPP ka la pynlong ïa ka jingïalang sngewnguh ïa ki nongkyrshan kiba la kyrshan ïa ki kyrtong ka seng ha kane ka ilekshon MLA ba dang shu dep.
Ha kane ka jingïalang kaba la long ha ka 18 tarik Lber 2023 ha madan Polo la ïohi ba ki paidbah kim shym la khih wat haba u slap u la ther tyngeh ha ka por ba u Bah Ardent u dang ai jingkren.
Haba ïa dei bad ka ilekshon MDC ha u 2024, u Bah Ardent u la ïathuh ba ka seng kan pynïeng kyrtong ha Khasi Hills Autonomous District Council (KHADC) bad Jaiñtia Hills Autonomous District Council (JHADC).
Nangta u la ïathuh kiba ïaleh na ka NPP, Congress, PDF, UDP ha kane ka ilekshon MLA ba dang shu dep, mynta ki wan pan tiket na ka VPP namar ki sngewthuh ba ka lyer ba khlaiñ ka beh ha kane ka rilum Khasi bad Jaiñtia.
“Lada ki wan sha ka VPP tang ban ïoh tiket, nga ai jingmut ïa ki ba kan bha ïa ki ban nym wan namar kam tikna ba ngin ai ha phi ïa ka tiket,” u la ong.
U la ong ba ka thong ba hakhmat ba kum ka seng ka buh, ka long ban ïoh thaw bad synshar da lade ha u snem 2028 hapoh ka jylla.
U Bah Ardent u la ong ba ynda la bat ka VPP ïa u lakam synshar, bun kiba tieng bad duh thiah namar ka seng kan kyndang naphang ïa baroh ki kam bamsap naba ka jingkwah ka seng ka long ba baroh ban im lang, ïabam lang, kiew lang, ym kum kito kiwei ban don tang katto katne ki heh spah, katba uba duk ban shu long mraw beit jong ki.
Ha kane hi ka sngi u Bah Ardent u la pynkup burom ïa u Bah Smiling Mylliemngap uba dei u nongthaw ïa ka jingrwai bad u Bah Skhem Myrboh kum nongrwai ïa ka jingrwai ‘U Prah’ kaba la pynshongshit shisha ïa ki paidbah ha kane ka ilekshon MLA ba dang shu dep shen.
